Ovakulupe voshiwana shovayelele otava hokolola tava ti ova ninga oihakanwa yokunyokomwa oshimaliwa shavo ngeenge tava lande oinima kovanhu hava landifile keependjela.
Onghee otava pula epangelo opo li kale tali tumu opolifi va kale tava tale ngeenge ovakulupe tava lande oushikepengeyo wavo keependjela.
Pefimbo Kundana a talela po oshiwana shovayelele kOmapundu avo momukunda Omalalapapa moshitukulwa shaHangwena, osha hokolola tashi ti ihashi twaalele vali oshimaliwa sha wana komaumbo molwaashi ohava nyokomwa oshendja yavo yoshimaliwa.
Ova ti unene tuu ovalumenhu hava landifile keependjela ohava nyokoma ovakulupe oshimaliwa shavo eshi hava kala tava kondjifwa va lande oinima yavo keenghono.
Omukulupe Helaria Haule weedula 88, okwa hokolola ta ti oha dulu okuyandja N$200-00 ngeenge ta lande oshiima shi na N$80-00 ashike iha pewa oshendja yaye.
“Omunhu konima ngeenge owe mu pe oshimaliwa sha kula oha faduka po a uka mokati kovanhu. Otwa lulilwa kovalumenhu tave tu nyokoma oshifilinga shetu,” Haule ta hokolola.
Maria Shikongo weedula 85 okwa weda po ta ti ohava findilwa kongudi kovanhu ve na eendingosho opo va kufe omikuli meendingosho davo nokonima omunhu ohe va pula va fute oshimaliwa sha pitilila.
“Ngeenge ova li omukuli wekende lomaadi li na N$30-00 mondingosho, eshi handi ka kwata opondjela omunhu ota futifa nge N$70-00 molwaashi vati ame omukwanghala,” ta hokolola.
Onghee okwa ti eshi oshi li eshongo linene va taalela momukunda wavo unene tuu kopendjela.
“Ovanhu ove tu dina molwaashi fye ovakwanghala. Paife otwa ninga oihakanwa yokukengelelwa nokutulwa mokatoo,” Shikongo ta ti.
Lopokati opo, oshiwana shovayelele shovanyasha shovakainhu osha weda po tashi ti osha lulilwa okukwatwa onghonga kovalumenhu ashike ihashi popilwa ngeenge tashi ka lopota koshitaashi shopolifi i li mokunda wavo pOmalalapapa.
Omukainhu weedula 28, okwa lombwela Kundana ta ti okwa kwatwa onghonga lwoikando ivali ashike opolifi kai na eshi sha ninga po.
“Inatu manguluka vali ngeenge hatu di keendingosho oufiku molwaashi ohatu kala twa telwa kovalumenhu moixwa va hala okuya nafye moixulo keenghono,” ta ti. – fhamalwa@nepc.com.na