ONGWEDIVA – Ovakwashiwana moshitunda shaNgandjera otava nyenyeta shaashi vati va ngabekwa okulandifa omwiidi woimuna modoolopa yaKahao.
Ova lombwela Kundana onghela tava ti ova ngabekwa okulandifa omwiidi kelelo laNgandjera onghee ova ti kashi li pauyuuki eshi elelo lavo la pitika ashike ovanhu vamwe va landife omwiidi.
“Omalenga amwe omelelo laNgandjera ohaa landifa omwiidi modoolopa yaKahao. Katu udite ombili shaashi ovanhu melelo laNgandjera inava talika ko ve fike pamwe,” omukwashiwana umwe ta ngungutula.
Omukwashiwana umwe okwa hokolola ta ti navo otava kongo ouxupilo ngaashi ovanhu aveshe hava kala tava landifa oilandifomwa yavo.
“Mongeshefa yokulandifa omwiidi ohatu mono mo oshimaliwa shokuyambidida omaludalo etu noshoyo okulanda oikulya meumbo. Otwa hala okulandifa omwiidi wetu tuhe na omangabeko molwaashi elalakano okulwifa ondjala noluhepo,” ta ti.
Ova hokolola tava ti ngeenge ova hangika tava landifa omwiidi ohau kufwa ko kelelo lavo.
Eshi a kwatafana naKundana omupopiliko welelo laNgandjela Sackeus Shangula, okwa ti kape na omunhu a pitikwa a landife omwiidi wa dja mofuka mu na oulifilo woshiwana.
“Otwa tula po omilandu kutya kape na omunhu a pitikwa a ka kashule omwiidi mofuka ponhele opo pe na oulifilo woshiwana. Omwiidi u li ponhele opo owa nuninwa ovanafaalama aveshe ndele kau shi wokulandifa,” Shangula ta ti.
Okwa weda po ta ti elelo ohali ningi eenghendabala dokushivifila oshiwana moradio opo shi xulife po okulandifa omwiidi woimuna.
“Omwiidi owa nuninwa oimuna. Oimuna oya pumbwa omwiidi wokulya opo kukelelwe oimuna iha fye kondjala,” ta ti.
Okwa yelifa ta ti omwiidi hau landifwa komalenga amwepo ohau di keefaalama davo vene ndele inau dja keenhele doulifilo.
Okwa kumaida oshiwana opo shi kale tashi kwatafana nombelewa yelelo ngeenge shi na oupyakadi wonhumba noshoyo okukala sha pula ouyelele kombelewa.