OMAFO – Ovalandifi voikulya yOshiwambo noihongomwa komaulikilo oipindi aHelao Nafidi otava nyenyeta tava ti eengeshefa davo itadi ende nawa molwaashi ihava mono ovalandi va wana.
Pefimbo Kundana a talela po omaukilo oipindi Omaandaxa, ovalandifi ova hokolola tava ti ova futa muni oshimaliwa shonhele opo tava landifile ashike kape na ovalandi.
Otava indile elelo lodoolopa opo li kale tali ningi omaulikilo oipindi kexulilo lomwedi fiyo oshivike shotete shomwedi mupe molwaashi omafiku oo ovanhu otava hangika ve na oimaliwa.
Ovanangeshefa ve dulife po150 mwa kwatelwa omahangano a yooloka otava ka kufa ombinga komaulikilo oipindi aHelao Nafidi neudo.
Omaulikilo oipindi okwa tameka momafiku 25 Etitano fiyo momafiku aavali Novomba kOmafo moshitukulwa shaHangwena.
Mopaife ngaha oshi li oshikando 14 odoolopa yaHelao Nafidi tai ningi omaulikilo oipindi okomundo.
Omukulupe Veronica Kashimilu a dile kOndangwa ta landifa oikulya yOshiwambo ngaashi eembe, omahandja, ondjove, oshuungu, omingome nosho tuu okwa ti neudo omaulikilo okwa lunduluka shaashi kamu na vali ovalandi ngaashi a kala shito nale.
“Inandi shi mona nale shi li ngaha tu li moipindi ndele kamu na ovalandi,” ta ti.
Okwa nyenyeta ta ti mendiki loipindi kamu na omashina eembaanga okuyandja oimaliwa.
“Ovanhu vamwe ihava ende noshimaliwa molwaashi ohava ka nana oshimaliwa meembaanga odo hadi kala moipindi,” ta ti.
“Onda futa oshimaliwa shonhele yokulandifila ashike efiku ohali dulu okupita po ina ndi landifa sha.
Hasho kwa li nda teelela omaulikilo oipindi a kale ngaha,” ta hokolola.
Namutenya Nakale naye ta landifa oikulya okwa weda po ta ti oikulya yavo oiha ningi nayi molwaashi ihai landwa.
“Ngeenge oshikulya sha telekwa sha ninga omafiku mahapu inashi pumbwa vali okulandifwa. Ihatu kala tu udite ombili ngeenge oikulya yetu inai landwa,” ta ti.
Lovisa Vatilifa naye ta landifa komaulikilo oipindi okwa ti mexuliloshivike okwa li va taalela eshongo lolusheno tali u ko.
“Okwa li ndi na omukumo kutya neudo ohatu longo oshimaliwa shihapu ashike paife otwa sholola molwaashi ovalandi kave po.