OSHIKANGO – Ovakwashiwana Ovaangola hava landifa omahooli kOshikango ova hokolola tava ti paife eshi ku na efundja ohava faduka po noku ka hondama momeva ngeenge tava taatawa kopolifi.
Ovalandifi ava otava ti ohava tauluka omeva efundja nomandini ava omahooli ngeenge tave uya okulandifa moNamibia. Tava ti oshinima eshi oshidjuu, ashike kombinga ikwao oshe va etela ouwa molwaashi paife ohava hondama ovapolifi noupu.
“Okwa li shipu kovapolifi va kwate ko omandini omahooli etu molwaashi okwa li have tu landula fiyo omoixwa, ashike paife ohatu faduka po ashike twa yuka momeva, ovapolifi ihave ya mo,” Dumingu Victory ta hokolola. Umwe okwa hokolola ta ti onghalo yaNgungula kaipu vali molwaashi omahooli koAngola ohaa di ko noudjuu molwefundja.
“Eendjila odi yadi omeva ashike ihatu teka omukumo wokuya kOshikango momandini etu. Katu na nghee molwaashi otwa hala okulonga oshimaliwa,” ta hokolola.
Nonande opolifi tai twikile okukelela Ovaangola vaha landife omahooli kOshikango, onghalo yokulandifa omahooli onghee tai twikile komesho.
Ngeenge owa i kOshikango oto hange ko ovapolifi tava kelele Ovaangola hava landifa omahooli paumbudi molwaashi inashi pitikwa moNamibia. Oitaashi yomahooli ine oya pata moshitukulwa shaHangwena molwaashi ovanhu ohava mbobolokele kuNgungula okukanwefa omahooli.
Pefimbo Kundana a ninga eenghundafana nOvaangola kOshikango, ova hokolola tava ti kombinga ikwao efundja ola etela oumatyona ondjala molwaashi itava dulu vali okutauluka momeva.
“Ovakulunhu ashike hatu dulu okutauluka omeva twa humbata omandini etu omahooli. Ounona otava dulu okufila momeva shaashi okwa ninga male,” umwe ta hokolola.
Omupopiliko wopolifi koshitukulwa shaHangwena Warrant Andreas Nghiyolwa okwa koleka ta ti Oshikango osha kondekwa komeva a dilila koAngola.
Okwa ti oshi li eshongo linene kovapolifi va landule Ovaangola fiyo omomeva molwaashi omupolifi ota dulu okuwila melambo.
“Eendobe domeva dimwe odi na eendungu osho shi li sha nyika oshiponga okuya momeva,” ta ti.
Nghiyolwa okwa ti ovapolifi otava twikile okulonga nelitulemo okukelela oimbuluma kOshikango, unene tuu Ovaangola ovo tava denge ovanhu. Okwa yelifa ta ti Ovanamibia ova ninga oihakanwa yokumonifwa oiponga nokunyekwa omaliko avo kOvaangola ngeenge tava i moAngola ile ve li kOshikango.
Okwa weda po ta ti Ovatoolinghundana ngeenge tava ka faneka nokukonga ouyelele kombinga yaNgungula ohava ningilwa omatilifo kOvaangola ve kwete eembele.
“Eetuwa dOvanamibia oda ninga oihakanwa yokudengwa nokutuwa komalola,” ta ti. Okwa ti konima ngeenge Omuangola okwa longo oshimbuluma iha kwatwa po molwaashi oha faduka po a uka moshilongo shavo. -fhamalwa@nepc.com.na