Opolifi mOhangwena oya pula ovaleli vongeleka opo veli vangeke oku kwatela komesho oinima ya nyika okuhe na elandulafano, okweenda ovanhu pokati, oinima ya nyika oulingilingi vo va fye oshisho kutya oshiwana otashi tyapula onghalo yombili ihe na oulingilingi.
Warrant Officer Kaume Iitumba wokoshikondo shoinima ya pamba okuyandja oulelele moshiwana koshitukulwa shaHangwena okwa popya edi pefimbo Ngolongeya woshitukulwa oshoWalde Ndevashiya a li ta popi novaleli vongeleka.
Ta ti omufita okuli omuhongi, omukwateli wovanhu kumwe, omuyandjimayele, nomuxungimwenyo oo e na oku li humbata nawa, noku li kaleka kokule noinima ii noyoukolokoshi.
Iitumba okwa li ta popi pefimbo loshoongalele shali koBilly Mwaningange Rural Development Centre (RDC) oko a popya yoo ta ti eengeleka paife otadi kumwifa shaashi odo vali tadi yo kondje yoveta, tadi ningi omaweelelo omaufiku aeshe, notadi longo konima yeevili odo da ufwa, do tadi piyaaneke eemhofi dovanhu.
“Ongelekwa ngeno oina oku kala onhele yelongeloKalunga nelimweneneno ashike paife oya ninga oteembili yehanauno nepiyaaneko lovanhu vahapu,” Itumba ta ti.
Ta ti eengeleka dimwe paife otadi weda ko konghalo youlingilingi moshitukulwa shaashi oyo tai lombwele oilyo kutya oya liwa kovakwapata vavo ile kookaume novashiinda, oshinima osho tashi eta outondwe nengwadjulafano moshiwana.
Ta ti opolifi kai li omhinge novanhu tava udifa ondjovo, ashike oili omhinge novanhu ovo tava eta engwangwano nelidengo mumwe moshiwana. -Nampa