Festus Hamalwa
Omulumenhu weedula 51 nomukulukadi waye weedula 48 ova anyenwa elifutilemo modolongo konima eshi va holoka momhangu yaShakati Etitatu, mekwatafano loshibofa shomahepeko omomaumbo.
Oshibofa shavo osha undulilwa komafiku 09 Juni neudo opo opolifi i kale ya ninga omakonakono e lixwa po.
Omukulunhu wopolifi koshikondo shokukonakona oimbuluma mOhangwena, omupedu Commissioner Zachariah Amakali okwa hokolola ta ti ovatamanekwa ova kwatwa po konima eshi vati va kala nokuhepeka ounona –okamati komido 10 nokakadona komido 14, ovo aveshe ve li outekulu vomusamane, oule womido nhano.
Ounona ovo vati ohava dengwa nai, naaka kokamati oka teka nokuli omayoo. Oshiningwanima eshi osha ningwa okudja omudo 2018 fiyo omudo 2022 meumbo lavo mOngwediva.
Ovatamanekwa ova kwatelwa keumbo lavo komukunda Ohadiwa moshitukulwa shaHangwena oshivike sha dja ko. Opolifi oya hokolola tai ti ouyelele owe uya kombada konima eshi omuhongifikola a mona okaana kokamati ka teka omayoo kofikola.
Vati okaana oka hokololela omuhongifikola wako kutya oka dengwa keumbo. Otaku hokololwa kutya ovaholafani ava ova kala nokuningila ovatekulu vavo omahepeko omomaumbo efimbo lile.
Oonakuninga oihakanwa ova tembulwa mo paife meumbo omo, nova twalwa keumbo lomukwapata umwe kOmuthiya.
– fhamalwa@nepc.com.na