Ofikola Onesi moshitukulwa shaMusati, oya hokololwa i na edina tali longifwa kookalyamupombo opo va dule okulila ovadali vounona hava fikola mo.
Omukulunhu womuhandjo Joseph Himulayi okwa hokolola kutya ova didilika onomola yo0813412436 tai dengele ovadali vounona hava fikola mOnesi tai va pula oimaliwa.
“Oshikando shotete, omulumenhu umwe okwa dengela umwe womovadali ongodi ta popi kutya oye Thomas Amakali omuhongifikola waNesi. Vati omudali ina futila okaana kaye okapakete keembapila dokuninga eekopi na tume oN$150, omudali ta tumu.” Himulayi ta hokolola.
Konima eshi vati omudali a pula kutya omolwashike Himulayi oye ite mu pula oimaliwa, shaashi oye ta longo noinima yeembapila, kalyamupombo vati okwa ti Himulayi okwa ya koshoongalele shi li koWindhoek ke mo monooli.
Efiku la landula natango onomola oyo tuu oyo vati oya dengela omudali ou ya dengela ngonghela tai tongo kutya okapakete keembapila komunafikola okwe ka landa. Ashike nande e ka landa, vati eshi ay a komuhandjo e ka twale ko vati okwa hanga omunafikola a vakwa eefewa daye nomaadi, vati ina yokaana natango natume vali oimaliwa.
“Konima yomafiku anini, ondi wete ashike eshi handi dengelwa komudali ta pula ngeenge osho ngaho nda aluka koshihongi koWindhoek, yee ta lombwele nge eshi shaningwa mo,” omutonateli womihandjo ta ti.
Himulayi okwa twikila kutya okudja opo okwa ka mona ovadali va koya puvahetatu, tava yandje eelopota kofikola va tuma oimaliwa kovanhu tava longifa edina lofikola. Okwa ti efimbo limwe ookalyamupombo ohava papida ashike omadina momutwe, voo fimbo limwe tava pula ngeenge ovadali ove na ounona hava fikola mOnesi opo va dule oku va nyokoma noku va tula mokatoo.
Okwa tumbula yoo kutya eshi inashi longwela ashike ofikola yavo, osha longelwa yoo osekundofikola yaRacuana.
Okwa ti ota indile ovadali aveshe ve na ounona hava fikola mosekundofikola yaNesi va kotokele okatoo koludi eli.
“Ohatu indile keshe ou to dengelwa kongodi uhe i shi tai ku pula oimaliwa, kendabala u kwatafane nofikola manga ino tuma opo uhe ke lihange oshihakanwa shokatoo,” Himulayi ta yelifa.