Okudja omudo 2021 fiyo oneudo moshitukulwa shaMusati omwa lopotwa ovalumenhu ve li 220 novakainhu 57 ve likufa eemwenyo. Edi oda popiwa komukulunhu wopolifi moshitukulwa shaMusati Commissioner Ismael Basson komutumba wovalumenhu oo wa li kOutapi Olomakaya.
Omudo 2021 omwa lopotwa ovalumenhu 46, omudo 2022 ovalumenhu 61, omudo 2023 ovalumenhu 75 omanga neudo omwa lopotwa ovalumenhu 38 ve limangeleka. Ovalumenhu va dja komikunda da yooloka okwa li va ngudumana komutumba wavo nelalakano lokukundafana kombinga youpyakadi womahepeko omomaumbo.
Omakanda okwa li taa topolelafana omayele kombinga younona tava kwatwa onghonga, oikumungu yomalidipao noshoyo onghalo yokulikufa eemwenyo.
Basson okwa popya ta ti ovalumenhu ohava kala va mwena ngeenge tava hepekwa kovakainhu vavo ashike konima yefimbo ohava ka ninga oihakanwa yokulonga oshimbuluma. “Ovalumenhu ihava dulu okukwena ngeenge tava hepekwa ashike ove na ehandu la nyika oshiponga,” ta ti.
Basson okwa koleka ta ti ombelewa yaye oya didilika ovanambelewa vopolifi hava yolo ovalumenhu ngeenge va patulula oibofa yokuhepekwa kovakainhu vavo.
“Ovanambelewa vopolifi ohava etifa ovalumenhu vaha patulule oshibofa molwaashi ohava yolwa,” ta ti. Okwa popya ta ti osha nyika oshiponga ngeenge omulumenhu ta shuna keumbo ina patulula oshibofa molwaashi okwa loloka okuhepekwa. Kakukutu kopolifi Inspector General Joseph Shikongo okwa ti omupolifi keshe ta ka monika ta yolo omulumenhu molwaashi a ka patulula oshibofa shokuhepekwa komukainhu waye ota pewa ehandukilo lopaveta.
“Omunhu keshe oku na oufemba wokupatulula oshibofa shaye. Ovapolifi ova pewa oshinakuwanifa shokuyakula nawa oshiwana pehe na omunhu ta ningwa okatongo,” ta ti. Shikongo okwa kumaida ovalumenhu opo va konge omakwafo kovaxungimwenyo, ovafitaongalo nosho yo kovapambele nookaume ngeenge tava hepekwa koupyakadi wopamadilaadilo ile tava ningilwa omahepeko omomaumbo.
“Ovanhu nava longele kumwe okukondjifa omahepeko omomaumbo noshoyo okukelela ovalumenhu vehe likufe vali eemwenyo,” ta ti.
Okwa kunghilila ovapolifi opo va xulife po okuyola ovalumenhu ngeenge tava ka patulula oibofa koitaashi yopolifi.
Shikongo okwa ti ngeenge omunhu a ka patulula oshibofa ina pumbwa okuyandja ehokololo laye mokati kovanhu ndele okwa pumbwa okutulwa monduda ye likalekelwa molwaashi omahokolola amwe ohaa kala oiholekwa. Eshi a kwatafana naKundana Minista woukashike kookanhu nonghalonawa yokaana Doreen Sioka okwa ti omitumba dovalumenhu oda fimana molwaashi otadi yandje ehongo nouyelele kovalumenhu.
Okwa ti ombelewa yaye otai unganeka opo omitumba davalumenhu di kale tadi ningwa komikunda molwaashi oko unene haku lopotwa ovalumenhu tava longa oimbuluma. Sioka okwa kumaida ovalumenhu opo vaha denge ovakainhu vavo ngeenge tava hepekwa ndele nava lopotele opolifi diva.
“Ovakainhu navo nava lopotele opolifi, ovashiinda ile ovaleli vopamufyuululwakalo ngeenge tava hepekwa,” minista ta ti.
Okwa lombwela ovalumenhu opo va twikile okukufa ombinga komitumba doludi eli shaashi oda fimana.
Natangwe Shiindi weedula 32 okwa pula opolifi nosho yo ouministeli woukashikekookanhu opo u kale tau unganeke omitumba dovalumenhu oikando ivali momwedi komikunda da yooloka.
Okwa ti unene tuu ovanyasha vakwao ova pumbwa okukufa ombinga komitumba dovalumenhu shaashi ovo unene tava longo oimbuluma paife.