Mexuliloshivike omwa lopotwa ovalumenhu vatatu va xulifa eshi va tuwa neembele noibofa ivali yeenghendabala domadipao.
Mushimwe shomwaayo, kamatyona keedula 19 oka tuwa nombele kukaume kaye pefimbo kwa li tava tanguna keendingosho momukunda Okalale moshitukulwa shaMusati. Omupopiliko wopolifi omupedu Commissioner Kauna Shikwambi okwa hokolola ta ti ovalumenhu ava okwa li tave lidenge ve kete eembele aveshe. Omufekelwa weedula 25 okwa monifwa oshiponga eshi a tuwa nombele kunakufya.
Oshiningwanima shikwao, omulumenhu weedula 20 okwa xulifa eshi a tuwa nombele pefimbo kwa li tava nu pamwe nookaume kaye. Oshiningwanima osha ningwa modoolopa Rehoboth efimbo lokomatango. Nakufya okwa tongololwa oye Brandley Brandon Nuseb omukalimo wodoolopa Rehoboth. Natango, omulumenhu weedula 23 okwa fya eshi a tuwa nombele monhulo kukaume kaye pefimbo kwa li tava tanguna.
Oshiningwanima osha ningwa modoolopa yaKahandja efimbo lokeengulasha. Nakufya okwa tongolwa oye Stanley Tjitavi Kamutua omukalimo womOkahandja.
Ovafekelwa aveshe ova kwatwa po notava pangulilwa oibofa yomadipao. Lwopokati opo, omulumenhu weedula 27 okwe lituwa mepandaanda a nangala mekungu lohonde modoolopa yaGrootfontein efimbo lokeengulasha.
Otaku hokololwa kutya omulumenhu ou okwa hangika a tuwa neembele lwoikando ya yooloka. koshipangelo opo a ka mone epango lopaunamiti ashike otaku hokololwa e li monghalo i li xwepo. Omufekelwa okwa faduka po nokonima okwa ka kwatelwa koRundu, eshi oshiwana sha longela kumwe nopolifi.
Oshiningwanima shikwao, omulumenhu weedula 21 okwa tambulilwa moshipangelo konima eshi a yashwa shaashi vati ta teya po omuvelo weumbo nelalakano a ka vake mo.fhamalwa@nepc.com.na
Oshiningwanima osha ningwa modoolopa yaPuwo efimbo lokeengulasha.
Otaku hokololwa kutya mwene weumbo kwa yasha omulumenhu ou mokuulu.
Mwene weumbo ina kwatwa po nomakonakono opolifi otaa twikile.
Caption. Omalidipao… Ovalumenhu vatatu va tuwa neembele.