Ovalumenhu vavali ova kwatwa po eshi va hangika nomandini omahooli e li 34 omanga omandini 230 okwa hangika ehe na sha eshi vati va landifa nale.
Ovalumenhu ova kwatelwa momaumbo avo komukunda Onaipalala moshitukulwa shaHangwena Etitatu efimbo lomutenya.
Omupopiliko wopolifi mOhangwena Sergeant Andreas Nghiyolwa okwa hokolola ta ti ovafekelwa ova hangika tava landifa omahooli kovakwashiwana ve na eetuwa ovo have uya okulanda kuvo shito.
Vati ovafekelwa ohava landifa shito omahooli kovanhu hava di koitukulwa ya yooloka nokonima ngeenge omunhu okwa lande naye ohaka landifa.
Ouyelele ou owa monika mo konima eshi oshiwana sha lopotela opolifi kombinga yovalumenhu ovo tava landifa omahooli.
Ovafekelwa otava holoka momhangu yaHangwena nena mEtitano notava pangulilwa oshibofa shoulingilingi shokulandifa omahooli paumbudi.
Okwa kunghilila oshiwana opo shi twikile nokuyandja ouyelele kopolifi kombinga yovanhu tava landifa omahooli paumbudi.
Okwa hokolola ta ti opolifi oya didilika ovanhu hava di komikunda ve hole okulandifila omahooli momaumbo avo komikunda shaashi vati opolifi ihai fiki ko noupu. Okwa ti ovakwashiwana hava di komikunda di li popepi neengamba daNamibia naAngola ova ninga eengeshefa dokulandifa omahooli momaumbo.
Lopokati opo, Nghiyolwa okwa weda po ta ti olwoodi pokati kOvaangola novaNamibia keengamba onghee ngaa tali twikile eshi ovakwashiwana vaAngola inava hala ovaNamibia va ka lande omahooli moshilongo shavo.
Onghee okwa ti eshi oshi li eshongo linene la talelwa kopolifi shaashi Ovaangola paife ova kwatwa komhepo yokudenga nopolifi ngeenge tai popi navo.