ONGWEDIVA – Neudo okwa lopotwa ovafita 12 veengeleka: Elcin, Katoolika noiveva ya yooloka vati va longa oimbuluma oyo ye va etela opo va kwatwe po.
Ovafita ava otava fekelelwa oimbuluma oyo tai difa omaxwilili notai kumwifa ngaashi omakwatonghonga a ningilwa ounona, omadipao ovapambele vavo nosho yo okukengelela ovanhu omaliko avo.
Oibofa italala oyo yo yovafita vavali voiveva va kwatwa po oshivike eshi – umwe omoshitukulwa shaHangwena, namukwao omOshikoto va kwata ounona voukadona onghonga.
Koshitululwa shaShikolo okwa lopotwa omufita weedula 23 a kwata okaana keedula hetatu onghonga. Oshiningwanima momukunda Onamishu moshikandjohoololo Eengodi. Omutamanekwa okwa holoka nale momhangulilo yamangestalata, nokwa anyenwa omhito yokulifutila mo modolongo.
Omufita mukwao wongeleka yoshiveva okwa kwatwa po onghelainya molwaashi vati a kwata okaana keedula 15 onghonga komomukunda Omhangela moshitukulwa shaHangwena. Omufita ou naye okwa anyenwa elifutulomo.
MEtitatu loshivike sha dja ko, omhangulilo yaMangestalata moRundu oya anyena omudiakoni wongeleka yaKatoolika kaRoma elifutile mo, omolwefekelo ledipao lomonamati. Otaku hokololwa Markus Max Musongo (68) a yasha lwoikando ivali nokudipaa omonamati Felix Musongo.
Pata wongeleka yaKatoolika kaRoma Max Hambabi ye okwa kwatelwe po muAguste eshi vati a dipaa ounona vavamwaina vavali, e va denga mosamende nokutataula omitwe davo. Hambabi okwa li ha longelee koRundu ashike oshimbuluma okwe shi longela keumbo lavo kOnakaolo moshitukulwa shaHangwena.
Komufala wopolifi koshitukulwa shaMusati Commissioner Ismael Basson okwa koleka yoo oibofa ya patululilwa ovafita vane moshitukulwa shaye. Vatatu vomovafita ovo ova patululilwa oibofa yekwatonghonga naumwe oshekengelelo.
Basson okwa ti oshimbuluma shitalala sha longwa moshitukulwa shaye osha longwa komufita wongeleka yoshiveva weedula 28 oo vati a kangelela omukainhu oshimaliwa sheeN$190 000.
Pastoli ou vati okwa li a kwatwa po ashike okwa ka efiwa shaashi vati okwa yandja oshimaliwa osho paudafano.
Omufita wongeleka yaElcin komukunda Okando koshikandjohoololo shaKalongo oku li modolongo konima eshi vati a kwata onghonga okaana kambulavo keedula 15 lwoikando ya yooloka.
Natango moshitukulwa shaMusati, Pastoli Elikan Neliwa (32) wongeleka yedina Have Mercy Mission Ministries – mOnepandaulo okwa kwatwa po eshi vati a kwata onghonga ovanafikola ve li vatatu vomido 17, 19 no24. Otaku hokololwa kutya oonakuninga oihakanwa ove li oilyo yongeleka yaNeliwa.
Omufita wongeleka yoshiveva komukunda Ombongo naye okwa kwatwa po shaashi vati a mitika okaana keedula 15 oko ka dalwa komukulukadi waye.
Moshitukulwa shaShana omwa lopotwa ovafita vane va longa oimbuluma. Omupedukomufala Fredrik Ndjadila, okwa hokolola omufita Stefanus Tonata Walende Oiva (34), wongeleka yedina Disciples of Christ Church mOngwediva, e li melifutilemo shaashi vati a kwata onghonga nokumitika okaana keedula 15. Oshininingwanima osha ningwa lwoikando ya yooloka kOmatando motuwa yomufita.
Omufita wongeleka yoshiveva weedula 35 okwa kwatwa po molwaashi vati a yasha nondjebo nokumonifa oshiponga omukainhu komukunda Oshinyadhila.
Moshitukulwa shaNgwediva natango okwa li mwa kwatwa po omufita umwe woshiveva muApiilili eshi vati a yasha omulumenhu womido 21 komukunda Ashaaga, shaashi vati okwa li ta piyaaneke elongelokalunga.
Natango omufita wongeleka yoshiveva, okwa kwatwa po shaashi vati a li ta kendabala okulongifa ekengelelo keembelewa dokuyandja omaufemba. Opolifi oya hokolola tai ti omulumenhu ou ove na okaana nomukainhu omukwashiwana Omuangola nokwa li ta kendabala vo nomukainhu umwepo opo va pefe okaana oukwashiwana waNamibia.
Oshiningwanima oshikwao, omufita wongeleka yoshiveva naye okwa kwatwa po shaashi a kengelela opolifi omo vati a twaalela eembapila doipupulu ta ti kutya oku na ongeleka ashike mboli kai shi yaye.