I Kae Matundu-Tjiparuro OTJOMUISE Onganda yo zohahende yOmbara yOvambanderu nOtjirata Tjombazu Tjombanderu, indji o Lorentz Angula, ya tjivisire Otjombanguriro Tjokombanda (High Court) kutja imba mbu i ikuramena po motjiposa pokati kOuhonapare wOmbanderu wOmbazu nOmbara Munjuku II Nguvauva kuna Erastus Tjiundikua Kahuure no vakwao omurongo kutja Otjombanguriro Tjokombanda Mbanda tji yarukire oumune auhe wOmupangure Collins Parker mbwayandja mOtjombanguriro tjOkombanda tja Namibia tjiyari 13 ku Kozonjanga mo 2007. Onganda yozohahende indji omatjivisiro inga ye ye hitisire Omandaha rotjiveke ihi tjiyari 14 ku Kambundu komutjangerepo wo Tjombanguriro Tjokombanda. Otja komutjiue woveta nambano mapezu kutja Otjombanguriro tjOkombanda tjitjayandja oumune motjiposa ihi matjiyandjere eningira indi poo indee nu tji tja yandjere ozohahende zovaningire azetungu otjiposa tjazo tjazumba inda zovazire azeririre ko tjazumnba otjiposa atjihaama omayuva ngatuwa po. Omupangure Parker tjaza no kupuratena ozohahende zominda aviyevari imbi oure womayuva yevari mOtjombanguriro tjOkombanda tjiyari 26 na 27 ku Seninarindi ombura indji, wa tuirika oumune we ape oure wo mayuva omurongo nayevari wovyungura. Tjayandja oumune we tjiyari 13 ku Kozonjanga watja ondiero yOuhonapare wOmbazu wOmbanderu nOmbara Munjuku II Nguvauva okukonda ongwa yo ma memeno wongunde veta yombazu yOmbanderu kaari nouwa, o u rizemburuka ouwa nu yari ondombakanise yongaro ombwa. Ondiero indji Parker wimuna okuhina ondikameno nu munao otje iyarukira ne ina kaura. “Munao kangamwa atjihe tjitja ungurwa poo tjimakuzu tja ungurwa kehi yoveta indji ya 1 ku Seninarindi mo 2005 katjipo. Munao ovaningire avehe mave kawondja komurungu movito vyao kehi yongunde veta noveta yombazu,” Parker watja nao. Watja mo Namibia kangamwa orutu orunane rondiero kaani ndji maiyenene okutuna komausemba, ozondero nawina omaundjiro wa katjotjiri womundu rwasere okuungura oukohoke. Munao kangamwa ondiero poo omukambo mbumautunu komundu mo mwano kangamwa wasere okurira omukohoke. Wina orutu indui poo omundu ingwi wasere okupandera pomazeva wongaro youndu. Watjere okuza nokutara kozoveta nomazeva peke peke tja ungura owatjiri orondu tjatoora oumune umwe uriri mbumautja omuzire omutenga noutjavari moku konda ongwa yo maunguriro wongunde veta vatomba ezeva rongaro yomaunguriro omakohoke yokuyandjera omunda imbo warwe okuraisa oumune wawo. Wina veritjinda nokuhina o u rizemburuka ouwa nu nokuhina ouwa. Komarambero wozorata movito vyao Parker watja mokutara mo marambero inga pasere oku purwa kutja hapo omurambe nguri Ombara yOvambanderu watjita nao kehi yomazeva we artikeri 18 rOngundeveta ya Namibia poo indee? Watja kapari ombata mo tutuu kutja Ovaningire mberi ozorata nda isakewa kovihavero vazikirwe movihavero imbi na ve tjiukisiwa nao morutuu ro kotjiveta rwo horomende otjo zorata zo mbazu zOuhonapare wOmbanderu otja koveta yOmauhonapare wOmbazu yo 1975 otja tji yarundururwa mo 2000. “Munao otji me i taverasana nOmutengwa Corbett kutja omuzire omutenga noutjavari vatomba e Artikeri 18 rOngundeveta ya Namibia. Mokutara mu imbi avihe okuyandjera ondiero indji kutja ikurame marire okupenga Ongundeveta. Munao ondiero yo muzire omutenga (Ouhonapare wOmbazu wOmbanderu) noutjavari (Ombara Munjuku II) okuramba omuningire omutenga (Erastus Kahuure) otjo Rata yOmbazu Onene no vaningire varwe otjozorata zombazu zomuzire omutenga otja koveta yo 2000, otji yayarukirwa na inakaurwa.”