Ovalumenhu vahetatu vovanadolongo ova tambulilwa moshipangelo konima eshi va dengwa nokuyashwa kovapolifi oshivike sha dja ko koshitaashi shopolifi kOshikango.
Ovanadolongo vati ova ninga oipute molutu alishe, omanga vamwe ova dinda omesho noipala inyanyalifa.
Omukulunhu koshikondo shokukonakona oimbuluma mopolifi moshitukulwa shaHangwena, omupedukomufala Zachariah Amakali okwa koleka oshiningwanima eshi.
Amakali okwa hokolola ta ti ongudu yovanadolongo 40 ove liunganeka okuteya mo oufano ovo va tulwa meni lodolongo.
Otaku hokololwa kutya oufano ova hangika ashike opo va tulwa mo efiku olo.
Pefimbo oufano tau tulwa mo ovanadolongo ova lombwela ovapolifi kutya oufano itau nangala mo, naashi osha eta ovanadolongo opo ve likufile oveta yokuteya mo oufano.
Okwa ti ovanadolongo ova longifa oitenda okudenga mo oufano omanga vamwe ova tema omundilo ndele tava xwike mo oufano mombada.
Oshiningwanima eshi osha monika komukulunhu woposhitaashi shopolifi pOshikango pefimbo a hangika ta tale kokompiuta oyo ya kwatafana noufano i li mombelewa yaye.
“Ovanambelewa vopolifi ova endelela opo va ye kovanadolongo. Ovanadolongo ove liunganeka ndele tava ponokele ovapolifi neengonyo,” ta ti.
Okwa hokolola ta ti okudja opo opolifi oya ufana ongudu yovapolifi vakwao ndele tava ka lafa ovanadolongo oupuka.
“Ovanadolongo ova longwa oshilongwa kovapolifi.
Ova dengwa opo va longwe omikalo,” ta ti. Okwa ti oshiningwanima eshi osha nyika oshiponga molwaashi ngeno osha eta oshiponga shomundilo.
Ovanadolongo vamwe ova tambulilwa moshipangelo shaShakati omanga ovanadolongo vakwao ve li koshipangelo shaNgela.
Ovanadolongo ova patululilwa oshibofa shokuteya po omaliko epangelo.
Kakukutu kopolifi yaNamibia Inspector General Joseph Shikongo okwa ti ombelewa yaye itai popile oshikumungu osho sha ningwa koshitaashi shopolifi kOshikango.
“Naame onda kumwifa koshikumungu shovanadolongo va monifwa oshiponga shi nyanyalifa,” Shikongo ta ti.
Okwa yelifa ta ti ita popile oilonga youxwapindi ya longwa kovanadolongo ashike oku li omhinge nomukalo ou wa longifwa kovapolifi okudenga ovanadolongo.
“Ovapolifi itandi ti kutya ove na epuko molwaashi navo okwa li tava kendabala okuliamena,” ta ti.
Okwa ti ovapolifi okwa li ve na okulongifa omukalo umwepo wokuyandja ehandukilo kovanadolongo molwaashi okumonifa omunhu oshiponga itashi ulike efano liwa.
Shikongo okwa ti ovanadolongo ova ninga epuko molwaashi ova longela omaliko epangelo omunyonena.
“Oufano ove na ondilo shaashi otwa longifa oshimaliwa shihapu okutula mo oufano ovo,” ta ti. Okwa lombwela opolifi opo i konge omukalo umwepo ngeenge tayi ungaunga novanadolongo.
“Ovanadolongo nave liufe komilandu da tulwa po kovapolifi,” ta ti.
Pefimbo va kwatafana naKundana ovapambele voonakuninga oshihakanwa ova nyenyeta tava ti opolifi oya ninga epuko molwaashi oya monifa ovapambele vavo oshiponga.
“Ovapolifi nava pewa ehandukilo ile va kufwe mo moilonga,” umwe womukwapata a popya. Ova pula kakukutu kopolifi Shikongo opo a yandje ehandukilo kovapolifi molwaashi ova longa oshimbuluma.