Ouministeli wounamapya owa yandja ouyelele nghee wa findana okupalela ondjila ovanafaalama opo va mone omhito yokulandifa oikwambelela aishe hai longwa moshilongo koMiddle East.
Omunambelewa omukulunhu moumisteli wounamapya Ndiyapuki Nghituwamata okwa ti ovanafaalama aveshe tava longo nounafaalama woimuna vokonooli noumbuanhu, unene tuu ava hava longo noutomeno, oshoyo ava hava landifa ombelela ova pewa omhito opo va tameke okutuma eembelela davo koUnited Arab Emirates oshoyo koQatar shi na sha nomangeshefelo.
Nghituwamata okwa ti ouministeli owa li u na omutumba no-UAE oshoyo Qatar opo va dule okukundafana shi na sha nongeshefa yoludi eli.
Okwa ti eenghundafana oda li pokati koumisteli novanambelelwa voundjolowele woinamwenyo voko-UAE, oministeli youndjolowele yokoQatar, oHalal Accreditation Authorities, Halal Market oshoyo Marketing Center.
Eenghundafana oda li da nuninwa etulepo lomifindalandu neendjidikila edi di na okushikulwa opo va dule okutumafana eembelela pokati koilongo ivali.
“Ovanambelewa voundjolowele woinamwenyo yok-UAE ova yelifa kutya, oinamwenyo opo i tumwe oku na okutalika koundjolowele wayo ngeenge otai dulu ngaho okutumwa kokule, yoo ombelela yayo natango inai nyikila ovalandi oshoyo ava tava ka lya oshiponga,” Nghituwamata ta ti.
Oilongo ivali oya tula po yoo eendjidikila dokutya keshe oshimuna tashi ka tumwa ile ombelela tai tumwa okudilila kokatomeno moNamibias nai kale i na eembapila da yela, okudja kounambelewa woundjolowele woinamwenyo nou li mondjila.
“Ei omhito iwa kovanafaalama oshoyo ava ve na outomeno veedi neengobe, opo va dule okuyambapaleka eliko lavo mokutuma eembelela davo di ka landifwe ko-UAE noQatar,” Nghituwamata ta ti.
Ouministeli owa pula ovanangeshefa ava ve na outomeno nove na omhito yokutuma ombelela va kale va shangifa omwaalu woinima yavo ei tava tumu kondje ngeenge va mono enyamukulo koHalal Accreditation.
taimihaihambo2000@gmail.com