Ovanafikola kofikola Nahas Ndevahoma Primary ova pangela eendjebo odo hava longifa okudipaa eenghuti noifitukuti.
Omukulunhuwiliki wehongo moshitukulwa shaHangwena Isak Hamatwi okwa koleka ta ti ovanafikola ohava tula eeholo keendjebo.
Okwa yelifa ta ti osha nyika oshiponga komunafikola ngeenge ta longifa ondjebo molwaashi ota dulu okumonifa ovanhu oshiponga.
“Omunafikola ota dulu okukwatwa komhepo yokutwaalela ondjebo yaye kofikola molwaashi ovanafikola vamwe ohava di popepi nofikola,” ta ti.
Okwa ti ombelewa yaye itai ka pitika omunafikola a twaalele ondjebo momudingonoko wofikola shaashi osha nyika oshiponga.
“Ovadali nava popye nounona vavo opo vaha etekele okutwaalela eendjebo davo kofikola molwaashi inashi pitikwa,” ta ti.
Omukulunhuwiliki wehongo okwa yelifa ta ti ovahongifikola inava manguluka vali ngeenge tava hongo molwaashi ohava kwatwa koumbada.
“Paife otu li mefimbo lidjuu omo ovanafikola kave hole okuliufa komilandu da tulwa po keefikola davo. Omunafikola ota dulu okukwatwa komhepo yokuningila omuhongifikola omatilifo,” ta ti.
Okwa weda po ta ti ovahongifikola vamwe ohava di popepi nofikola, naashi otashi eta va kwatwe koumbada.
Okwa weda po ta ti otashi piyaaneke yoo vali elihongo lovanafikola shaashi otava kala alushe tava diladila okudimbuka diva opo va ye koukongo weenghuti noifitukuti.
Umwe womuhongifikola okwa ti ovanafikola va pangela eendjebo otava ulike ounongo wavo.
“Osha fimana opo omunafikola a longife ounongo waye ashike osha nyika oshiponga eshi ovanafikola tava longifa eendjebo,” ta ti.
Otaku hokololwa kutya ovanafikola ohava toola eeholo deendjebo momufitu momukunda wavo molwaashi ofikola yavo oya tungwa ponhele opo kwa li pe na okamba yovakwaita pefimbo loita.
Okwa didilikwa ponhele opo ha pa toolwa oitopifa yeeboma.