Iiviyongo- Ongudu yovanafikola va dja keefikola da yooloka oya li ya ngudumana etitano kIiviyongo Combined School, ve uya okupewa omapapa molwa ekufombinga lavo lakula mokutalela po eengulumambo oshoyo okulesha.
Ngoloneya woshitukulwa shaShana Elia Irimari, okwa tumbula kutya alushe oshivike shaxuuninwa shaSeptemba ohashi dimbulukiwa onga oshivike shokulesha omambo. Eshi okweshi popya momushangwa waye wa li tau leshwa kuKansela waKatana Edmund Iishuwa.
“Neudo exuku lokudimbuluka oshivilo eshi osha li koshi yoshipalanyole “Omahepeko oomeme nounona, opo tu pashule ovanafikola koimbuluma yomahepoko a yooloka hai longwa efiku nefiku,” Irimari ta tumbula.
Okwa twikila kutya, okudja mo 2020 fiyo omo 2023 opolifi oya lopotelwa oibofa yomahepeko oomeme nounona yafika po10478.
Eengulumambo otadi yandje omuyelele kounona e nasha noininganima yoludi eli, nghee ve na okulihumbata oshoyo oku kandula po omaudjuu a yooloka ngeenge ve lihange muo.
Ovanafikola vahapu pefimbo loshivilo ova li tava fiyafana moinima ya yooloka ngaashi okulesha, okupataneka, oshoyo efiyafane po loitya ya yooloka.
Protasius Uuyuni omukulunhufikola wopIiviyongo okwati oku udite etumba lakula eshi ofikola yaye oyo ya hoololwa moshitukulwa i ningilwe oshivilo sholudi eli.
“Ei natango omhito yakula opo ovanafikola, va hangane voo va shiivafane navakwao, voo va shiive eshi tashi linyenge mounyuni aushe,” Uuyuni ta tumbula.
Okwati nonande ofikola yavo nayo oili imwe yomwaado da kufa ombinga mokupewa omapapa, natango oya kondekwa komaudjuu ahapu.
Uuyuni okwati ofikola oi li mokati koshana, nopefimbo lodula oha longo noudjuu. Okwa twikila kutya onghalo yoludi eli oya etifa ovadali va kufe po ounona vahapu pofikola vatembukile keefikola dimwe poo tapa fyaala omwaalu ushona.
Oudjuu ukwao u li po ou li povadali inava hala okukufa ombinga mokuyandja oimaliwa yokufuta ovateleki vetete lounona pofikola. Eshi osha etifa ofikola ikale ina ashike ovateleki vetete vavali hava tekele ounona vakoya po 300.
“Eshi ohashi kala shidjuu shaashi ngeenge omuteleki umwe a kala ina holoka umwe ou ha kala po oha longo noudjuu,” Uuyini ta ti.
Caption: Oshivilo shokulesha omambo… Protasius Uuyuni Omukulunhufikola wokoIviyongo combined school
Efano: Taimi Haihambo