ONDANDWA – Omukulunhuwiliki wehongo moshitukulwa shaShikoto Aletta Eises okwa ti osha fimana ngeenge ovanafikola tava pewa ouyelele kombinga yomaifano a yooloka opo va kale ve shi omaifano oo va hala oku ke lihongela.
Eises edi okwe di popya onghela pefimbo lomauliko omaifano mOndangwa.
Okwa ti oshitukulwa shaShikoto ohashi yandje ehongo nouyelele kombinga yomaifano.
Ovanambelewa va dja koipupudilo yopombada ya yooloka okwa li va holoka opo ova yandje ouyelele kovanafikola.
Okwa ti ngeenge omunafikola e na eshivo kombinga yomaifano a yooloka ita ningi oshihakanwa shokulihongela eifano la puka.
“Omunafikola ngeenge te lihongele eifano laye lomondjila nokuhole oilongwa i li keifano olo otashi xwaxwameke a pite nawa,” ta ti.
Okwa weda ko ta ti otashi kwafele yoo ovanafikola opo va mone oilonga noupu molwaashi oku na omaifano amwe ehe na eemhito doilonga hadi monika noupu.
Secilia Shiviya ha fikola kosekundofikola Omuthiya Gwiipundi Secondary School okwa ti okwe lihonga shihapu kombinga yeifano eli a hala oku ke lihongela koshiputudilo shaUNAM.
“Onde lihonga kutya omaifano amwe mboli kahe na eemhito doilonga hai monika noupu, onghee onda hala oku ke lihongela oupangi molwaashi ondi hole oshilongwa shomwaamulu nounongononi,” ta ti.
Tobias Nghidipohamba ha fikola koKing Kauluma Combined School e li mondodo onhi-10 okwa ti ote ke lihongela omalusheno kEenhana VTC.
“Opo nde shi udu kutya koiputudilo yopaungomba ohaku di ovanhu tava ka ninga eengeshefa davo,” ta ti.
-fhamalwa@nepc.com.na