EEMBAXU – Omukulunhu woshiputudilo shEenhana NUST Lukas Shikulo okwa ti osha fimana ngeenge ovanafikola tava pewa ouyelele nehongo kombinga youhongelwe womaifano a yooloka.

Shikulo edi okwe di popya pefimbo ovanafikola va dja keefikola da yooloka moshitukulwa shaHangwena okwa li va ngudumana koshiputudilo shoNUST tava pewa ouyelele nehongo kombinga yomaifano a yooloka.

Ovanafikola okwa li va mona omhito yokushakeneka ovanambelewa va dja koiputudilo ya yooloka pefimbo loshinyangadalwa eshi sha li kendiki laBilly Mwaningange oshivike sha djako.

“Ngeenge omunafikola a pewa ouyelele kombinga yeifano olo a hala e ke li hongele otashi mu kwafele opo a kale e na eudeko kombinga yefimano lasho,” ta ti.

Shikulo okwa yelifa ta ti eyandjo louyelele kombinga yomaifano ota li kwafele ovanafikola va hoolole okulingela omaifano oo ve hole. 

Okwa ti oshivilo shokuyandja ouyelele kombinga yomaifano osha fimana yoo vali kovanyasha nokovakulunhu ovo va hala oku ke li honga koiputudilo yopombada.

Omudo keshe oshipupudilo shaNUST oha shi unganeka oshivilo shokuyandja ouyelele nehongo kovanafikola ve li meendodo ngaashi 10 nonhi-11.

Okwa didilikwa ovanafikola have ke li hanga tave li hongele omaifano ashike kave na ouyelele wa wana kutya eifano olo te li hongele oli li kombinga ya shike.

Naashi oha shi eta opo ovanafikola vamwe veke li hange vehe na oilonga molwashi eifano omaifano oo ve li hongela kae na eemhito doilonga.

Ovanafikola vamwe ohava ningi eedula dihapu koiputudilo tava lundulula omaifano oo tave li hongele shaashi otava dopa.

Shikulo okwa ti oshipupudilo shavo otashi twikile nokuyandjaneka ouyelele nokuyandja omayakulo kovanafikola.

 Lukas Sheenya e li mondodo onhi-11 kEembaxu Combined School okwa ti okwa pandula eshi a mona omhito yokupewa ouyelele nehongo kombinga yeifano olo a hala oke li hongela.

“Ka kwa li ndi na ouyelele wa wana kwaasho nda hala oku ke li hongela. Ouyelele ou twa pwa nena owa fimana shaashi otau tu kwafele tu kale tuna eeshivo la wana,” Sheenya ta ti.

Okwa ti okwa hala e ke li hongele oundokotola woimuna molwashi paife okwa mona ouyelele we lixwa po.

“Otashi kwafele ngeenge oiputudilo yopombada tai talele po eefikola da yooloka nokuyandja ouyelele molwaashi ovanafikola vamwe ihava mono omhito yokufika koNUST,” ta ti.

Oshipupudilo shoshitayi shaEenhana NUST osha totwa po momudo 2021 noha shi yandje eetundi momaifano a yooloka.

Neudo oshiputudilo eshi okwa li sha ninga oshivilo shotete shedjalo lomanganguwo oshikando shotete.

fhamalwa@nepc.com.na