Ovanafikola 61 kofikola kOnaushe Combined School moshitukulwa shaShana ova pewa omaano omidjalo dofikola koshikefa shovalihongi (SRC) koshiputudilo shoIUM.
Ovanafikola ova pewa omaano ngaashi eenghaku, oikaifino, eembulukweya nosho tuu, oshivike sha djako pofikola yavo.
Omidjalofikola odi li pongushu yoshimaliwa shoN$4000.
Omunashipundi woSRC koshitayi shoIUM kOngwediva, Toivo Akunda okwa ti otava lalakanena okuyambidida ovanafikola ve li momhumbwe yoikwafifo yehongo.
Okwa ti ombelewa yaye oya lopotewa kombinga yovanafikola ve li momhubwe yomidjalofikola, naashi osha eta opo aka yambidide.
Akunda okwa ti osha fimana ngeenge ovanafikola ve na oikwafifohongo ya wana molwashi otashi va tu omukumo ve li honge nondjungu.
“Ovanafikola otava ka ninga ovanashilonga vomaifano a yooloka noshoyo ovaleli vokomongula,” ta ti.
Akunda okwa kumaida ovanafikola opo va fimaneka ovahongifola vavo, okulihonga nelitulemo noshoyo oku li kaleka kokule nokulongifa oingangamwifi nomalodu.
Omukulunhufikola poNaushe Combined School Gebhard Amunyela okwa pandula oshiputudilo shoIUM molwokuyambidida ovanafikola nomidjalofikola.