ONGWEDIVA – Omukulunhuwiliki wehongo moshitukulwa Ohangwena Isak Hamatwi ota ti ovanafikola mOhangwena ove lilongekida okushanga omakonakono a xuuninwa unene tuu ondodo 11 nonhi-12.
Okwa ti eefikola ngaashi Onamukulo Combined School, Oshaango Combined, Onanona Combined School noshoyo tuu eefikola dimwepo da ninga omalongekido ovanafikola va ka dje mofikola opo ve lihonge noupu.
Ovanafikola otava ka tameka omakonakono momafiku 18 omwedi ou fiyo momafiku avali Novomba.
Hamatwi okwa pandula ovadali eshi ve liunganeka okuongela oikulya opo ovanafikola va dule okutelekelwa pefimbo tava di mofikola.
“Osha fimana ngeenge ovanafikola tava di ponhele ya mwena opo va dule okulihonga noupu.
Onghee ovanafikola vahapu ohava ende eendjila diledile tava ka shanga omakonakono ashike paife otava di mofikola,” Hamatwi ta ti.
Okwa ti ovanafikola ngeenge hava di mofikola ohave ve lihongo nawa molwaashi ohava kala ve li metonatelo lovahongifikola tava pukululwa oihongwa yavo nokupula omapulo noshoyo okulipukulula navakwao.
Okwa ti ovanafikola vamwe ova taalela omashongo ngeenge ve li komaumbo ngaashi okuhe na olamba yokuminikila ngeenge tave lihongo noshoyo okupewa oilonga ihapu kovadali keumbo.
Okwa kumaida ovakulunhu ovo ve na ounona tave lihongele omakonakono komaumbo opo vaha piyaaneke elihongo lounona noku va pa oilonga ihapu molwaashi okaana oka pumbwa efimbo la wana lokulihonga noshoyo okufuda po.
“Ovakulunhu nava tonatele ounona wavo vaha ye keendingosho ile keengeleka domaufiku. Ovakulunhu nava kwashilipaleke kutya ounona ove na oikulya ya wana komaumbo,” ta ti.
Lopokati opo, Hamatwi okwa ti eefikola odo di na omihandjo mOhangwena ode lilongekida okutonatela ovanafikola pefimbo lomakonakono noshoyo okukwashilipaleka kutya kekulo oku na oikulya ya wana.
Okwa weda po ta ti ei oyo omhito iwa kovahongifikola va kale tava pukulula ovanafikola oihongwa ei vehe udite.
fhamalwa@nepc.com.na