Ovanailonga vehangano loAfrica Personnel Service(APS) hava longele modepo yoCoca-Cola mOshakati ova ninga ekangha lopambili tava pula ehangano lo-APS li xulifwe po diva vo va kutwe meyukililo kuCoca-Cola.
Tava ti vahapu vomuvo ova longa efimbo lile veli ko kokontalaka, vehe na eamenenopo loilonga nosho yo omauwa ovanailonga a wedwa po.
Ovanilonga ova ninga ekangha lopambili Etitano mOshakati tava nyenyeta tava ti ova loloka okulonga eevili da pitilila, ashike ohava futwa eendjabi dinini.
Ova hokolola tava ti kave na omauwa ngaashi opendjela nosho yo omauwa opaunamiti.
Onghee ovanailonga otava pula opo va pewe oilonga moCoca-Cola molwaashi ova loloka okumonifwa oixuna kehangano lo-APS.
Ova pula ouministeli woilonga opo u popye naCoca-Cola opo aha longe vali na-APS shaashi ehangano olo otali longifa omukalo woukoloni nokatongotongo.
Festus Mwoombola ota ti okwa longela ehangano lo-APS eedula 22 ashike okwa ti fiyo opaife oku li kokontalaka.
“Kandi na odjabi ya tulwa po yokomwedi. Ohandi futwa ashike ngeenge nda longa. Ngeenge inandi longa omafiku mahapu ohandi futwa okamaliwa kashona,” ta ti.
Okwa ti oha futwa ashike N$14. 40 movili, onghee okwa ti kashi li payuuki eshi a longela ehangano lo-APS efimbo lile ashike iha mono omauwa.
Immanuel Malakia oha yelula nokutulika oipakete mololi nokwa hokolola ta ti oha futwa N$130 mefiku konima ngeenge okwa mane okuyelula oipakete yeenamunate mololi omanga ngeenge okwa tula mo oipakete ihe na sha iha futwa.
“Ohandi ka longa ashike ngeenge pe na ololi ya pumbwa okuyelulwa. Ohandi dulu okuninga nande oshivike inandi ka longa,” ta ti. Pefimbo ta tambula ko omukandanyenyeto oo wa dja kovanailonga, omukulunhu wehangano lo-APS monooli Sybrand de Beer okwa ti ombelewa yaye oya didilika omashongo a taalelwa kovanailonga.
“Otwe lipyakidila nokuninga omitumba nehangano lo-Nafau noshoyo ouministeli woilonga opo tu kundafane nghee tu na okuyambidida ovanailonga vetu,” ta ti.
Okwa ti ombelewa yaye otai ka yandja enyamukulo diva ngaashi naanaa sha pulwa kovanailonga.