Ovanailonga pomahooli mOpuwo otava nyenyeta kutya ota va mono oixuna molwa onghalo yoilonga oyo ya nyika oukoloni noshoyo eendjabi dihe li paveta.
Tava ti otava longifwa eevili da pitilila, ashike ihava futwa ngaashi sha ufwa koveta. Vati naaavo ngoo va longela pomahooli opo efimbo lile, fiyo onena ohava futwa ashike N$1000 komwedi. Ova hokolola kutya ohava longo efiku alishe, ndele ihava mono nande okafudo komusha.
“Opena ongudu yaava hava tameke po 06am fiyo opo 15h00, naava hava tameke po 15h00 fiyo opo 22h00,” umwe womovanailonga ta ti.
Ovanailonga ova popya kutya onghalo ove wete ili xwepo eshi paife hava xuulile po 22h00 keshe efiku molwa eshi va xulifa po omukalo wokunangalifa ovanhu oufiku moilinga.
Umwe okwa yelifa kutya pefimbo kwali hava nangala moilonga okwali hava pulwa va kudjal eembidja dopaumwene shaashi inava pewa omidjalo doilonga delixwapo.
Vati ihava pewa omafudo, ohava longo ashike keshe efiku fiyo odula tai kateka. Tava ti ihava pewa oumbapila veendjabi (payslip) oshoyo ouyelele ta wuulike kutya ohava futwa ingapi komwedi.
“Ohatu kala hatu pula ondjabi yetu yokomwedi i wedelwe ndele ohatu nyamukulwa ashike kutya ou wahala oku wedelwa owa manguluka oku fiya po oilonga,” ovanailonga tava hokolola.
Eshi vati hashi nyemateke osheshi kutya ohava longo oimaliwa ihapu keshe efiku ndele ohava pulwa ashike veke i mbaange. “Fyee otwa loloka nongeenge itave tu nyamukula ohatu katu ka katuka vali onghatu yo pombada tuye keembonge di na sha noufemba womunhu oshoyo edi dili momufinda landu wokukandulapo oupyakadi woludi eli,’ tava yeli fa.
Maria Angula omutuvikili nomukwateli komesho woiniwe yokomwedi mokambani ka li ena omanyamukulo enasha noku holola ngeenge omanyenyeto adja kovanailonga oshili tuu, ile oipupulu pefimbo lekwatafano lavo noshifo kundaneki. Okwa lombwela omutoolinghundana kutya otave keli nyika komilungu pamwe novahona vaye oshoyo ovanailonga opo veke likunde kombinga yoshiningwanima vati.