Namibia okwa lopota ovanhu 30 va xulifa koshidu Malaria momukokomoko wedula yoneudo. Ava ovo vamwe vomovanhu 10, 800 ovo va konaakonwa noku monika oMalaria moshilongo ashishe.
Omivalu edi oda yandjwa Ominista ikulu youhaku nonghalonawa Dr Richard Kamwi pefimbo lepatululo pambelewa yoshikonga shokupombela momaumbo komukifi woMalaria mOkongo moshitukulwa shaHangwena, oshivike shadja ko.
Kamwi ta ti omukifi woMalaria onghee tau twikile nokudipaa ovanhu moilongo ya ihapu mounyuni.
Okwa ti osha fimana opo ovanhu va twikile okukala tava pombele omiti momaumbo.
Kamwi okwa yelifa ta ti opombela yoMalaria ohai yandjwa oshali kouministeli wouhaku nonghalonawa onghee okwa kunghilila oshiwana opo shi kale tashi kwatafana noipangelo ile omandiki ouhaku opo shi etelwe omayakulo opombela.
“Malaria ota dulu okulelwa nopangwa ngeenge oshiwana tashi liufa komilandu odo da tulwa po okukondjifa Malaria,” Kamwi ta ti.
“Otwa didilika omashongo a taalelwa koitukulwa imwepo unene tuu komikunda ngeenge tashi ya poikwafifo yokulwifa Malaria. Onghee okwa ti ota ka tula moilonga opo Namibia a kale umwe woilongo muAfrica te ke shipondola okukala a kondjifa Malaria,” Kamwi ta ti.
Kamwi ou e li yoo vali onga omukalelipowiliki woshidu Malaria moSADC okwa ti ota twikile okuyambidida oshikondo shouhaku opo ku kelelwe oshidu Malaria kovanhu noshoyo kounona.
Okwa weda po ta ti oshiwana nashi kale tashi topolafana ouyelele nehongo nghee shi na okukelela Malaria noshoyo okukala tashi lopotele ovanailonga vouhaku ngeenge shi na omadiliko aMalaria.
“Malaria oshidu shimwe eshi hashi dulu okudipaa ounona va shona noupu ngeenge okaana ina ka tuvikilwa monete. Onghee osha fimana opo ovadali va kale tava tonatele ounona vavo efimbo keshe opo vaha like keemwe,” Kamwi ta ti.
Moshipopiwa shaye ngoloneya waHangwena Walde Ndevashiya okwa ti ope na ovakwashiwana vamwe vehe hole momaumbo avo ta mupombelwa onghee okwa kunghilila oshiwana opo shi kale tashi yandje omhito kovanailonga vouhaku va pombele momaumbo avo.
Ndevashiya okwa weda po ta ti oshipangelo shaNgela osho shimwe sha monika omuvalu u li pomboda wovanhu va kwatwa koMalaria ve li 540, Eenhana 373 omanga Okongo 163.
Okwa kunghilila oshiwana momidingonoko opo shi liufe komilandu odo da tulwa po okukelela Malaria shaashi osha nyika oshiponga ngeenge omunhu a kwatwa kuMalaria.