OSHAKATI – Minista womauyelele nomakwatafano opaungoba Emma Theofelus onghee ngaho ta twikile nokuhandjakaneka oveta i na sha noilanduli yOvanamibia, ava ve hole okushinda ovanhu komalungula. 

Oshikonga shehandjakanifo louyelele ou, oshe lipyakidila noitukulwa yokonooli, omo Theofelus a tuma ovanambelewa vopombada okudilila kouministeli waye, opo va handjakanife ouyele u na sha noilanduli yeshindo lokomalungula. 

Omishwangwa edi da dja kouminsteli da yandjwa komunambelewa wopombada okudilila kouministeli Johannes Fillemon mOshakati Omaandaxa oda yelifa kutya, olushindo lokomalungula ha kutuka ashike ovanhu, ndele omwakwatelwa oinima ihapu. 

“Oinima ihapu ongaashi okuhandjakanifa omafano ovakulunhu osho yo ounona ve li hamunghele unene ve li koshi yeedula omu-18. Okuhandjakaneka omafano ovanadolongo, okunyanyuna oiholekwa yovanhu, okuningila ovanhu omatilifo, okweeta oiholekwa yomunhu pouyelele komalungula, okulongifa eengodi ile eekompiyuta dovanhu uhe na eufilo, okulongifa omadina ehe fi oshili komalungula nelalakano lokulongela ovanhu ominyonena osho yo okulongifa oilonga ihe fi yoye uhe na eufilo okudja kumwene wayo,” ta yelifa. 

Odokumende natango oya nongonona yo ouyelele u na sha naava ve na eengeshefa dokomalungula doipupulu kutya navo itava ka pitikwa vali. 

Oveta ei oya teelelika i ka tulwe moilonga pamutumba wopashiwana, ou wa tameka nena, novatauluki voveta otava ka pewa omahandukilo avo a kwata moiti. 

-taimihaihambo2000@gmail.com