Auleria Wakudumo
Omupedu wiliki moumisteli weemina Gloria Simbuli okwa indila oshiwana shikale shili oupafi ngeenge taku holoka omakakamo edu monakuiwa.
Eshi osha pitifwa momukanda kouministeli weemina noikwanghono shadja eshi Namibia a dengwa komakakamo edu avali peenhele da yooloka oshivike shadja ko.
Momukanda wa pitifwa kouministeli weemina Etivali, owa holola kutya omakakamo edu okwa ningwa mOkahandja oshoyo mOpuwo.
Ekakamo ledu lotete vati olina eenghono di fike po 3.7, la denga oule weekilometa 27 koumbangalanhu-ninginino waGross Barmen mOkahandja potundi 09h30 yongula, Olomakaya.
Ekakamo etivali, ola li lina eenghono do4.2 nola kwata oule weekilometa 10 koumbangalanu-ninginino wOpuwo. Ekakamo eli vati ola didilikwa Osoondaxa yomafiku 10 Novemba lwopo 12h14.
Oshiwana osha indilwa shi longife omikalo da yooloka ngeenge kuna ekakamo ledu.
Simbuli okwa holola kutya ngeenge omunhu okweli hanga eli meumbo pefimbo lekakamo ledu, na kendabale okuhondama koshi yoshitaafula, nongeenge okweli hange eli pondje, na kendabale akale ponhele yaandjuka kokule nomatungo, omiti oshoyo eengodi domalusheno.
Okwa weda po ta ti pefimbo opo tuu opo, ovanhu naveli vangeke okukala popepi nomakende voo nava kale kokule oinima oyo tai dulu okuwa.
Simbuli okwa ti Namibia naSouth Africa aveshe ova didilika omakakamo edu omafiku aa.