Auleria Wakudumo
Ovanamukunda vomomukunda Iipumbu moshikadjohoololo Oshikuku ova dika eenyala medu inava hala okutambula ko oshikunino sholwishi noikwambidi osho sha pewa onhele momukunda wavo.
Nakupewa onhele Thomas Kanime okwa holola ta ti okwa pewa onhele yoshikunino kumwene womukunda waIipumbu okudja mo2014, ashike ina dula okulonga pefimbo molwominino domeva dovanamukunda dimwe odo da enda monhele omo. Kanime okwa ti okwa ya meenghundafana naavo ve na ominino da enda monhele omo opo va kufepoi, ashike vamwe ove mu nyamukula omakambilaka.
“Molwaashi onda lombwelwa kumwene womukunda kutya edu ohandi li kufwa ngeenge itandi longo mo sha, onda tokola okupululifa mo Etitatu opo ndi hovele oilonga yange. Ondali ndelineekela ovanhu ava vena ominino ovedi kufa mo nale, ashike natango mboli inadi djamo,” Kanime ta ti.
Kanime okwa ti okwa teta ominino domaumbo a hanga muatatu eshi ta pulula. Kakele kominino, Kanime okwa holola ta ti ovanamukunda inave mu halela vati momukunda wavo, navamwe ovemu lombwela aka pewee du oku adja.
“Onda uda nai shaashi otashi ulike natango kutya oukwamuhoko muhapu movakwashiwana. Nonande naame Omukwambi mukwao, shaashi vati kandishi ndomomukunda omo, nandi ye oku ndadja,” Kanime ta ti.
Mwene womukunda waIipumbu Rauha Nikanor okwa tie du laKanime ola pewa pauyuuki ngaashi ashike ovanhu aveshe va pewa omadu. Nikanor okwa holola yoo kutya shaashi vati Kanime okwa hala okulonga olwishi, okwa indila a pewe moshana ndele hakomutunda ngaashi omaumbo ile omapya. Kanime ine li kufila edu ashike okwe li pewa moipafi yeekomitiye novakwashiwana, vamwe vati ve li shangifa omadina avo nokuli opo va pewe oilonga moshikunino shaKanime.
“Kanime okwa pewa nale edu olo nakeshe ou kwali ena oudjuu okwali ena okuuya kwaame tete. Edu Olomunamibia keshe ena oufemba woshilongo ndele kalishi loohandimwe,” Nikanor ta ti.
Ovakwashiwana ovo vali va fufaeka pefimbo loshiongi ova lundila mwene womukunda kutya vati iha longele kumwe navo ngeenge ta ningi omatokolo edu. Ovati oshinima shoshikunino vati oshili ashike pokati kamwene womukunda naKanime.
Ova holola kutya ova kala nenota okudja Etitatu molwa ominino davo odo da tetwa kuKanime nova hala a fute omeva avo oo a hepa efiku olo a futwe nokushuninwa ominino davo medu meendelelo.
“Kanime na shune ashike oku adja shaashi okweya ponhele youlifilo weengobe detu. Inatu pumbwa noxo oshikunino sholwishi momudingonoko wetu noilonga oyo ta popi inatu i hala,” vamwe vomovanamukunda tava ingida.
Kanime okwa kwashilipaleka aveshe va tetelwa ominino kutya ota ka landa ominino davo ndele ta lundulula onhele yado opo a yande okuteta ominino davo monakudiwa. Okwa ti yoo ota kaya kombelewa yomeva opo a fute omeva a hepa efiku olo.