ONGWEDIVA – Ovanangeshefa 150 mwa kwatelwa omahangano a yooloka otava ka kufa ombinga komaulikilo oipindi aHelao Nafidi neudo. 

Omaulikilo oipindi otaa ka tameka momafiku 25 Kotoba, Etitano, fiyo omomafiku avali Novomba ponhele opo hapa ningilwa oipindi melelo lodoolopa yaHelao Nafidi moshitukulwa shaHangwena. 

Mopaife ngaha oshi li oshikando oshi- 14 odoolopa yaHelao Nafidi tai ningi omaulikilo oipindi okomudo. 

Omupopiliko melelo lodoolopa yaHelao Nafidi Selma Kapembe okwa ti ove lilongekida okuninga oipindi molwaashi oinima aishe oya tulwa peenhele. 

Okwa ti elalakano lomaulikilo oipindi okuyandja omhito koshiwana opo shi landife oilandifomwa yavo mwa kwatelwa ovanyasha. Okwa weda po ti ei oyo omhito iwa koshiwana okukala she limonena oyuuyemo nokueta po eemhito doilonga pefimbo lokulandifa. 

“Omaulikilo oipindi okwa fimana molwaashi otaa yambula po odoolopa tashi pitile mokunana ovanangeshefa va ninge omangeshefelo modoolopa yaHelao Nafidi,” ta ti. 

Okwa yelifa ta ti ovakeleli vomaliko okudja komahangano a yooloka otava ka kala mendiki loipindi efimbo keshe okukandeka oimbuluma. 

“Otwa shivifila nale ovanambelewa vopolifi opo va kaleke po eameno efimbo keshe mendiki lomangeshefelo. Oshiwana inashi pumbwa okutila molwaashi otaku kala eameno la wana efimbo keshe,” Kapembe ta ti. 

Okwa kumaida oshiwana opo shi ha etelele oilwifo shaashi osha nyika oshiponga ngeenge omunhu e na oshilwifo mokati kovanhu. Kapembe okwa ti oshiwana nashi talele po oumalikilo opindi molwaashi otaku ka kala omayakulo a yooloka ngaashi okuyandja omaufemba keembelewa doikwameni nomataulikilo okeengamba. 

“Omahangano a yooloka ile ovanangeshefa vashona ve na ehalo lokukufa ombinga komaulikilo oipindi okwa manguluka okukwatafana nombelewa yetu molwaashi natango otu na onhele ya wana,” ta ti. 

–fhamalwa@nepc.com.na