ONGWEDIVA – Opolifi moshitukulwa shaShana oya kumaida oovene veefitola, neendingosho opo va kale va kwashipaleka kutya peengeshefa davo ope na ovakeleli vomaliko va wana nove na eedjebo shaashi paife ookalyamupombo ova ninga vahapu. Omupopiliko wopolifi moshitukulwa shaShana Inspector Frieda Shikole okwa ti eefitola paife oda ninga oihakanwa yokuponokelwa koolyamupombo hava kala ve li meengudu ve kwete eedjebo nomakatana. 

Opolifi oya ti ovanhu navo ova ninga oihakanwa yokumonifwa oiponga kookalyamupombo ngeenge tava pulwa oimaliwa. 

Osh i v ike sha dja ko okwa lopotwa oibofa ivali yeefitola mbali da ponokelwa koolyamupombo mOshakati nOngwediva. 

Opolifi oya ti omaumbo nao okwa ninga oihakanwa yokutewa unene ngeenge ovanhu va kofa eshi hava pandwa mo koolyamupombo omanga ovanhu ngeenge va dja po ohava hange omaliko a vakwa mo. 

Okamini kedina Ongwe ke li mOngwediva oka ponokelwa kovalumenhu vatano va kwete omakatana ndele tava kufa mo oshimaliwa shi fike N$45 344. 

Oshiningwanima osha ningwa efimbo lokomatango pefimbo ofitola ya patuluka. 

Natango, ofitola yedina Onawa 24/7 hai landifa oikulya molukanda Oneshila mOshakati oya ponokelwa kookalyamupombo vane ndele tava vake mo oimaliwa i fike poN$9 273, eengodi nhatu dopeke omanga omunhu umwe a monifwa oshiponga. 

Oshiningwanima osha ningwa Omaandaxa efimbo loufiku pefimbo ovanailonga va hangika ve li moilonga. 

Opolifi oya hokolola tai ti umwe womulumenhu omulandi a hangika mofitola okwa monifwa oshiponga eshi a dengwa nohamala ndele ta tuwa vali nombele. 

Okwa li a tambulilwa moshipangelo shaShakati ta mono epango lopaunamiti. 

Otaku hokololwa kutya ovakeleli vomaliko ka kwa li ve na eedjebo pefimbo loshiningwanima. 

Opolifi oya hokolola tai ti ovafekelwa ova monika koufano ovo ve li mofitola ashike ouvidio ina va yela nawa. 

Onghee itava dimbulukiwa kutya oolyelye. Fiyo opapa ka pena omufekelwa a kwatwa po moibofa aishe yokuponokela eefitola. 

-fhamalwa@nepc.com.na