ONGWEDIVA- Omupresidente wehangano lovanhu ve na oulema woshipa loNamibian Albino Association, Joseph Ndinomupya okwa ti oilyo yehangano laye oya taalela eshongo linene molwaashi oipangelo yepangelo itai yandje vali omaadi okuvava kovanaulema ovo.
Okwa ti paife ova ninga eedula mbali ina va pewa omaadi nonande ovanhu voshipa shitoka otava pumbwa omaadi a longwa sheli kalekelwa.
“Ovanhu ve na oulema woshipa okwa li hatu pewa omakende omaadi osha li koipangelo yepangelo ashike paife oha shi ningwa vali,” ta ti.
Ndinomupya okwa ti ovanhu ovo vehe na oyuyeemo yokuli landela omaadi ovo unene tava dengwa konghai yokuhe na omaadi. Okwa ti ombelewa yaye ohai ningi eenghendabala yokuyandja omaadi koshiwana ngeenge ya mona omakwafo.
Okwa yelifa ta ti omaadi okwa fimana molwashi oha kwafele oshipa shavo shi ha pye komutenya noshoyo okulela okuninga oipute. “Ehangano letu oha li pewa omakwafo okudilila moshiwana ngaashi omaadi, omakende nomambale okukelela,” ta ti.
Okwa weda po ta ti omudo wa djako ehangano lavo okwa li la pewa omakwafo omakende nomambale komunyekadi omutivali waNamibia Penexupifo Pohamba. Okwa indila ovaleli vopapolitika novanangeshefa opo va twikile okuyambidida ehangano lavo molwashi ova pumbwa omakwafo omaadi, omakende nomambale.
“Oshiwana na shi kale nombili novanhu ve na oulema woshipa pehe na okatongo molwashi navo ovanhu ashike ngaashi naana Ovanamibia va shitwa,” ta ti. Eshi a kwatafana naKundana, omupopiliko mouministeli wouhaku Walters Kamaya okwa ti ovanhu ve na oulema woshipa ka kwa li hava pewa omaadi okudja kouministeli wavo ashike okwa li ohava pewa omaadi okudilila kombelewa yopedu-Presidente. “Omaadi okwa li ashike a yandjelwa koipangelo ndele iha di kouministeli wouhaku,” ta ti. Okwa popya ta ti fiyo opapa kena sha ouyelele kutya molwashi ovanhu ihava pewa va li omaadi.