Ovanhu 1 261 va dja momikunda da yooloka moshikandjohoololo shaKongo ova ningilwa omakonakono omukufi oTB koshipangelo shaKongo oshivike sha djako.
Omakonakono okwa ningwa oule womafiku atatu omo kwa li oshiwana sha holoka momwaalu muhapu.
Omukulunhu woprongalama yomakonakomo omukifi woTB moshitukulwa shaHangwena, Lebirius Iipinge okwa ti ovanhu vahetatu ova monika omukifi woTB konima eshi va ningilwa omakonakono.
“Ovanhu va monika oTB ova tameka nale nepango lopaunamiti lavo noshoyo okupewa ehongo nouyelele nghene ve na oku li umbata pefimbo ve li kepango,” ta ti.
Okwa ti elalakano lomakonakono omukifi ou opo kukelelwe omwaalu muhapu wovanhu ve na oTB hava kale mokati ka vakwao noshoyo okukwashipaleka kutya omunhu keshe e na oTB okwa tameka epango laye pefimbo. “Osha fimana ngeenge omunhu a ningilwa omakonakono molwashi ota kala eshi kutya okwa fikama peni,” Iipinge ta ti.
Iipinge okwa ti pefimbo lomakonako ouministeli wouhaku okwa li wa yandjaneka eetuwa dokututa oshiwana okudja komikunda da yooloka va uka poshipangelo.
“Epengelo ola didilika kutya oshiwana osha taalela eshongo lokuenda oshinano shile ngeenge sha pumbwa omayakulo opaunamiti. Onghee naashi osha eta opo ouministeli wouhaku u ningile oshiwana omakonakono oTB,” ta ti.
Okwa weda po ta ti omakonakono okwa li yoo vali a ningilwa koshipangelo shaEenhana nEngela omo ovanhu va dja momikunda da yooloka kwa li va ningilwa omakonakono.
Iipinge okwa kumaida ovanhu va monika oTB opo va dinine epango lavo lopounamiti noshoyo oku li kelela okulongifa oikolwifa.
“Oshiwana nashi twikile okutalelapo omandiki ouhaku opo shi ningilwe omakonakono omukifi da yooloka,” ta ti.
Onghee okwa ti ovanhu ve na omadidiliko omukifi woTB nava lopotwe diva opo va ningilwe omakonakono.
Lwopokati opo, kansela woshikandjohoololo shaKongo Efraim Shipindo okwa pandula ouministeli wouhaku eshi wa yandja omhito yomayakulo ouhaku nelalakano lokuningila ovanhu omakonakono omukifi ou.
Shipindo okwa kumaida oshiwana shi longele kumwe mokukondjifa omukifi woTB tashi pitile mokuyandja ouyelele kovanailonga vouhaku.