Elelo lodoolopa yaNdangwa olla yandja eenhele dedu kovanhu ve li 47 opo va dule okutunga po omaumbo avo.
Ovanhu ava ova pewa omikanda doumwene wedu oshivike sha dja ko.
Pefimbo ta yandje omikanda doumwene wedu omunambelewawiliki melelo lodoolopa yaNdangwa, Ismael Namgongo okwa ti elelo lodoolopa yaNdangwa otali lalakanene okukandula po omukundu wovanhu vehe na omalukalwa. Ta ti osha fimana ngeenge omunhu e na onhele i li kedina laye mwene opo a dule okutunga po eumbo laye. Okwa yelifa ta ti ovanhu va pewa eenhele dedu okwa li va ninga omaindilo nova kala ve li momusholondodo wovaningi vomaindilo fiyo tava pewa.
Okwa weda po kutya natango ove na omusholondodo wovanhu va ninga omaindilo edu ashike otava ka pewa eenhele davo momudo tau ya ngeenge muni a mono po vali eenhele.
Onghee okwa kumaida oshiwana opo shi kale sha ngungumana fiyo tashi pewa edu, ndele haku liku fila eenhele.
“Peenhele odo otapa kala pe na omayakulo aeshe ngaashi omeva, olusheno noudjuwo,” Namgongo ta ti.
Okwa kumaida ovakalimo opo va tunge omaumbo a kola itaa dulu okupepwa po komhepo.
Namgongo okwa ti oonakupewa eenhele otava ka kala tava futu kelelo lodoolopa N$105-00 komwedi keshe.
“Oshimaliwa tashi futwa otashi ka longifwa okuwapaleka peenhele dimwepo opo konima tapa ka pewa ovanhu va ninga omaindilo,” ta ti.
Maria Shekunyenge umwe womovanhu va pewa eenhele ota ti okwa pandula elelo lodoolopa yaNdangwa eshi le va pa edu.
“Onda ninga eindilo ledu momudo 2017. Onda kala alushe nda hala onhele yedu ndi tunge po eumbo lange, onghee paife ohandi ka tunga eumbo lange,” ta ti. Omunyasha weedula 28, Salmon Meduletu okwa ti okwa ninga eindilo ledu momudo 2018 nopaife ota dulu okutunga eumbo laye.