ONGWEDIVA – “Ovanhu otava lundile nge kutya onda lika keyoka shaashi kwa li nda ka konga oupule omanga vamwe otava kakeke edina lange kutya onda ya moixulo nomushamane wovanhu a hombola. Onghee paife kandi na vali ombili yokomwenyo molwaashi ohandi kala alushe nda hala okulimangeleka.”
Aa omatumbulo aElizabeth Joseph weedula 43 ou vati a lika keyoka lwoikando ivali ta nyenyeta nghene vati ta lundilwa kovanhu.
Joseph okwa ti oha dengelwa eengodi nokutuminwa omatumwalaka koshiwana tashi muula kutya okwa tuminwa eyoka molwaashi a ya nomushamane wovanhu.
Okwa yelifa ta ti yee ina nangala nomushamane wovanhu noshoyo kakwa li a ya keendudu a ka konga oupule.
Joseph omukalimo womomukunda Oipapakane moshitukulwa shaHangwena, okwa ti okwa lika tete keyoka momudo 2015 pefimbo kwa li a hangika koilonga pOmafo, efimbo lomutenya.
“Onda tetwa okuulu nokwooko nokudja opo onda kala ndi li kokatemba,” ta ti.
Okwa hokolola ta ti momudo 2021 okwa lika vali keyoka meumbo lavo efimbo loufiku pefimbo olo a hangika nale a ninga oshilema e li kokatemba.
“Okudja opo okuulu kange oka tameka taka ningi kalaula. Onda ninga efimbo lile moshipangelo handi mono epango ashike kape na elunduluko,” ta hokolola.
Okwa weda po ta ti kashi li mondjila eshi ta lundilwa molwaashi okwa lulilwa nale molwoulema nokukala e li kokatemba efimbo keshe. fhamalwa@nepc.com.na