O m u n a s h i p u n d i w e l e l o laUkwanyama Eliaser Waandja okwa kunghilila oshiwana opo shi xulife po okukukala tashi patulula eendingosho efimbo leevili dongula osheshi ovanhu ova pumbwa okukala tava longo momapya.
Okwa ti omunhu keshe taka hangika a patulula ondingosho yaye eevili dokulonga momapya ota ka kala a pewa ehandukilo lopaveta pamufyuululwakalo welelo laUkwanyama.
Onghee okwa kumaida oshiwana opo shi kale tashi lopotele ovakulunhu voikandjo yavo yopamufyuulukalo kombinga yovanhu tava patulula eendingosho efimbo longula.
“Eendingosho a dishe nadi patululwe 13h00 konima eshi ovanhu va dimbuka momapya. Ka pena omunhu e na oufemba wokukala a patulula ondingosho yaye efimbo longula,” Waandja ta ti.
Edi Waandja okwe di popya Etivali eshi a ninga eenghundafana naKundana kombinga yoshikumungu shovanhu ve hole okupatulula eendingosho ongula.
Okwa ti elelo laUkwanyama ita li ka fiya emanya la londa ku li kwao neudo kombinga yomunhu ou ina hala oku li ufa komilandu odo da tulwa po kelelo.
Onghee okwa kumaida ovanhu opo va fimaneke omilandu a dishe da tulwa po kelelo.
Waandja okwa yelifa ta ti osha fimana ngeenge ovanhu tava longo nelitulemo momapya opo va dule oku li monena oipalwifa yoikulya ihapu momapya.
Okwa ti e li olo efimbo liwa lodula tai loko opo oshiwana shi kale tashi longo momapya, ndele a ku pitila eengula keendingosho.
“Oshiwana nashi xulife po okukala sha teelela okupewa oikulya yoshikukuta kepangelo shaashi oshi na omhito yokukala sha longa oikulya yavo momapya,” ta ti.
Waandja okwa weda po ta ti oshiwana nashi kale shina ombili nelongelo kumwe momikunda davo noshoyo oku li kaleka kokule nokulonga oimbuluma.
Omudo wa djako elelo lOvangandjela ola li la ninga omutumba eshi kwa li ta li kunghilile oshiwana opo shi xulife po okukala tashi patulula eendingosho pefimbo leevili dongula.
fhamalwa@nepc.com.na