ONGWEDVA – Ovanyasha ve na oulema wa yooloka vokoitukulwa ine moshitopolwa shanooli, ova pangela okuninga oshihongiilonga mOngwediva shi na sha nonghalo yavo omu ve li.
Elalakano loshihongiilonga eshi vahapu vomuvo ova tumbula kutya ova didilika eshongolo loufikepamwe ngeenge tashi ya kwaava ve na oulema naava vehe na oulema. Ova tumbula kutya paemhito dihapu ihava talika ko ongovanhu ve na oshilonga moshiwana molwoukwatya wavo. Vati ova hala oufikepamwe oshoyo ouwa ou tau pewa ovanhu aveshe moshilongo.
Ova twikila kutya vahapu vomuvo ova pumbwa eemhito doilonga, ashike ihave di pewa molwoufikepamwe wovanhu ou uhe po moNamibia.
Moses Mandume umwe womovakufimbinga okwa hokolola kutya vamwe vomuvo ohava kala va hala okukufa ombinga momaudano a yooloka aa tava dulu ashike ihava pewa omhito.
Mandume okwa ti vahapu vomuvo ova kala omutumba nokweeta eemhumbwe davo kutya ova pumbwa oilonga unene tuu ava ve na eedjapo, eefikola, omaumbo meedolopa e li popepi nomakwafo ngaashi oipangelo shaashi otava mono oixuna komikunda. “Vamwe natango otava pula eefikola dounona ve na oulema di hapupale moNamibia shaashi odinini, doo odi li komakule.
Minista yomaudano Agnes Tjongarero, oo a li omukufimbinga nomupatululi woshivilo paveta, okwa tumbula kutya ovanhu ve na oulema wa yooloka navo ova pumbwa oufikepamwe ngaashi ovanhu aveshe.
Tjongarero okwa hokolola yoo kutya ovanhu ve na oulema navo pewe eemhito. “Fikameni mu kale hamu ende tamu konghola poivelo yeembelewa nakeshe apa tamu dulu shaashi kepe na ou tashiiva eshi mwa pumbwa ngeenge inamu shi yelifa,” Tjongarero ta ti.
Tjongarero okwa tumbula yoo kutya ekemo neemhumbwe lovanhu ve na oulema ote ke li tula moilonga opo va kale va nyamukulwa.
Ngoloneya woshitukulwa shaShana Elia Irimari oo naye a li omukufimbinga okwa popya kutya otaka kala omutumba noongoloneya vakwao vokoitukulwa itatu opo va popye kombinga yoshikumungu shomaumbo omodoolopa, taa pulwa kovanhu ve na oulema. Irimari okwa twa yoo ovanhu ve na oulema omukumo vaha sholole, nova pule komesho moinyangadalwa ei ve lipyakidila nayo meenghalamwenyo davo.