Auleria Wakudumo 

Omupeduminista wehongo, eenghulunghedi, omaungoba, ovanyasha nomaudano Dino Balloti okwa indila ovanyasha opo va kufe ombinga nokukwatela komesho oinima yopaunongo ngaashi okunduluka po sha opo va dule okumona oyuuyemo. 

Minista edi okwe di holola pefimbo ta popifa engafifi lovanyanyamaulu koshiongalele osho sha li sha unganekwa koNational Youth Council of Namibia (NYC) mEenhana Osoondaxa. 

“Ovanyasha ova pumbwa va kale ve na ekwatafano la kola noshikondo shounongo. Ounongo nomadilongo ovanyanyamaulu otaa dulu okuyambula po oshikondo eshi,” minista ta holola ngaho. Ovanyanyamaulu okudja keembinga adishe doshitukulwa ova li va ongala okuteka mo sha mombao yomuprima osho yo ovapopi vakwao va fimana. 

Balloti okwa holola kutya ovanyasha ova pumbwa okukufa ombinga manga kuyela opo va xwaxwameke ekufombinga lavo nokuuya po neengeshefa davo dounongo. 

Minista okwa ti omupresidente Netumbo Nandi-Ndaitwah naye ota popile ekufombinga lovanyasha moinima yopaunongo. Eshi okwa ti otashi kwafele okushunifa omwaalu wovanyasha ovo vehe na oilonga pedu. 

Oshi k ondo sho inima yopaunongo oshi li ponomola onhiheyali yoikondo ihetatu oyo ya talika ko ya fimana noya pumbwa okuyambulwa po moshilongo. 

“Oshikondo eshi ohashi tulwa ashike pombada koshitalendi shomunhu, endulukepo loshinima shonhumba osho sha yooloka kuihapu hai ndulukwa efiku keshe, eendunge doudalelwamo d omunhu, okunduluk a oinima yopamufyuululwakalo, yoshinanena osho yo omalihafifo oo taa dulu okuyandja oilonga kuvahapu,” Balloti ta ti ngaho. 

Ovanyasha ovo va holoka ova mona omhito okupwilikina kovanangeshefa nghene ve shi endifa, omukalo ve na okweenda nomakwafo oo va pumbwa opo va tote nokuyambula po eengeshefa davo. 

Ovanyanyamaulu ova li yo ovanelao okutala oilongomwa imwe yovanangeshefa vanini. 

Minista okwa twa ovanyasha omukumo mEenhana opo vaha fye ounye oilonga yavo, ve i longife okuyambula po eliko loshilongo. 

Balloti okwa holola yo kutya ouministeli otau twikile okuyakula ovanyasha opo oindulukwamo yavo noilonga aishe yopaunongo oya longifwa okuyandja oilonga netumba moshilongo. 

-awakudumo@nepc.com.na