EENHANA – Oshiwana otashi nyenyeta kombinga yovapangi hava longele moshipangelo shEenhana vati itava yakula nawa ovanaudu.
Ovanaudu ova lombwela Kundana tava ti ngeenge va ya koshipangelo ohava nyamukulwa nai kovapangi omanga ovapangi vamwe ohava kala ashike ve li meengodi davo.
Ova hokolola tava ti unene tuu efimbo loufiku ovanaudu ohava kala ashike momikweyo efimbo lile pehe na ou te va yakula.
Omukainhu umwe okwa hokolola ta ti okwa li a twala okaana kaye koshipangelo efimbo loufiku ashike okwa lombwelwa kutya kape na oshendja yoshimaliwa N$100 osho kwa li e kwete. “Onda lombwelwa kutya nandi ye ndi ka konge oshendja. Okaana kange okwa li ka kwatwa koshidu neenghono onghee kakwa li handi dulu oku ka konga oshendja,” ta hokolola.
Okwa ti okudja opo omupangi umwe okwe mu lombwela kutya ita pangifa okaana kaye molwaashi kape na oshendja. Omulumenhu umwe okwa nyenyeta ta ti eyakulo koshipangelo shEenhana otali va nyemateke nai efimbo loufiku. Omudo wa dja omukulunhuwiliki wouministeli wouhaku nomayakulo opashiwana, Ben Nangobe okwa ti ovanaudu nava kale tava kufa ko omadina ovapangi ngeenge itava yakulwa nawa noshoyo okushivifila ombelewa yomukulunhu woshipangelo.
Eshi a kwatafana naKundana omukulunhuwiliki wouhaku moshitukulwa shaHangwena, Johannes Hango okwa ti otaka ninga omutumba novapangi opo a dule okupopya navo kombinga yoshikumungu eshi.
Omukulunhu woshipangelo shEenhana Dr Ngoni Mutambwe okwa ti ovanaudu nava kale tava lopotele ombelewa yaye ngeenge tava ya kulwa nai kovapangi.
Okwa weda ta ti oshipangelo osha taalela eshongo kashona molwaashi ohashi kala shi hadi efimbo loufiku.
Onghee okwa ti naashi osha eta ovanaudu opo va kale ve li momukweyo efimbo lile molwaashi efimbo limwe ovapangi ova pumbwa okuyakula tete ovanaudu va mona oiponga. fhamalwa@nepc.com.na