Auleria Wakudumo
Ongwediva- Omwaalu wovapolifi 133 moshitukulwa shaShana ova mona omaifano ape, tava ifanwa paife inspector, senior inspector oshoyo ovakonaakoni voimbuluma vopombada Omaandaxa.
Omukulunhu wopilifi moshitukulwa shaShana, Commissioner Naftal Lungameni Sakaria okwa shiivifa omadina aavo va yelwaayelwa oshoyo oku va dika eembadi dipe meembonge dakula dopolifi moshitukulwa shaShana mOshakati.
“Elitulemo lovapolifi okulongela nokuamena oshilongo noshiwana shaNamibia otali pandulwa. Onghene aveshe ove lilongela omaifano mape tava ka pewa nena mokupitila mokulonga nondjungu moilonga yavo nokulitula mo mwaasho tava ningi,” Sakaria ta ti.
Umwe womwaavo va mona omaifano mape, Beverley Nawases okwa pandula omukulunhu wopolifi Inspector General Joseph Shikongo eshi eva yelaayela. Nawases okwa ti ka kwali a teelela a yelwaayelwe ashike okwa hafa eshi e li mwaavo va pewa omaifano mape.
Umwe natango a yelwaayelwa okudja ku-inspector, ta ifanwa paife senior inspector commander Hermud Uugwanga oo e li omukwateli komesho womainda omeendjila mOshana naye okwa holola olupandu meifano lipe. “Eyelaayelo otali ti oilonga oya wedelwa. Ngaho osha yela kutya otu na okutula etemo momupini opo tu kwashilipaleke eameno lOvanamibia,” Uugwanga ta ti. Sakaria okwa dimbulukifa ava va yelaayelwa kutya ombadi va pewa ipe kai fi youfuuli komapepe avo ndele okuulika kutya otave ke litula mo moilonga yavo nokulonga shi dulife eshi kwali tava ningi nale. Sakaria okwa ti omaifano mape oku na oku monikila moilonga yomupolifi keshe.
“Okuya komesho, opolifi itai ka yelaayela vali ovapolifi shaashi ashike va hala okuya pombada. Ou na okukala we lilongela eifano loye lipe. Ohatu ka tala oohandimwe ovo hava longo noudiinini moilonga yavo, sho osho u wete u li apa nena okumona ombadi yoye ipe, osheshi mutu wa kala nokulitula mo moilonga yeni,” Sakaria ta ti.
Sakaria okwa twa omukumo ovapolifi inava mona omaifano mape, opo va twikile nokulonga noudiinini. Nomhito ya shikula ko otava ka dimbulukiwa.