Omudo wa dja ko fiyo oneudo okwa lopotwa ovanambelewa vopolifi 154 ovo kwa li va kwatwa po molwaashi va longa oimbuluma ya yooloka.
Ovapolifi va longa oimbuluma omwa kwatelwa ovalumenhu 146 novakainhu vahetatu.
Edi oda kolekwa komupopiliko wopolifi omupedu Commissioner Kauna Shikwambi meenghundafana va ninga naKundana oshivike sha dja ko.
Okwa ti ovapolifi 152 ova pewa elifutilemo modolongo omanga ovapolifi vavali natango ove li mokakuma.
Shikwambi okwa koleka ta ti ovapolifi ova longa oimbuluma ngaashi okushinga nouhaasha, omahepeko omomaumbo, okulongifa ombumbo noshoyo okudenga ovanhu noku va ningila omatilifo.
“Oibofa ya patululilwa ovapolifi onghee nga otai twikile noku ningilwa omakonakono,” Shikwambi ta ti.
Shikwambi okwa ti oshikondo shopolifi itashi popile ovanambelewa vopolifi tava longo oimbuluma molwashi ka pena omupolifi a pitwa okulonga oimbuluma.
Lopokati opo, minista woikwameni neameno lokeengamba Albert Kawana okwa ti ovanambelewa vopolifi ove li ninga ookalyamupombo eshi paife navo hava kala tava longo oimbuluma mwa kwatelwa oulingilingi.
Onghee okwa ti ovapolifi nava xulife po okufutwa ombumbo molwashi osha nyika oshiponga komunambelewa wopolifi ngeenge tava longifa oulingilingi.
Edi minista Kawana okwe di popya omwedi wa dja ko pefimbo kwa li ta patulula pambelewa oshitaashi shopolifi molukanda Tutaleni moWalvis Bay.
Kawana okwa kumaida ovapolifi opo va xulife po okulonga oimbuluma molwashi itashi ulike efano liwa moshiwana.
Okwa li yoo vali a kumaida ovapolifi opo va kale tava ulike oshihopaenenwa shiwana moshiwana nokwashipaleka kutya otava longo pauyuuki.
“Oshinakuwanifa shomupolifi okukeleka po eameno loshiwana. Ovapolifi ovanhu ve linekelelwa koshiwana onghee osha fimana opo ovapolifi va kale ve na ekwatafano liwa noshiwana,” Kawana ta ti.
Kawana okwa weda po ovapolifi nava fimaneke oilonga yavo noshoyo oku li fimaneka vene unene tuu ngeenge ve li momudjalo woilonga.