ONGWEDIVA – Ovapolifi vaNamibia tava longele pokati keengaba daAngola naNamibia mOshikango moshitukulwa shaHangwena ova hokololela oshifokundaneki eshi nghee hava di monghalo itai nuwa omeva.
Ovanambelewa ova popya kutya ohava nangala meetenda di li popepi noilonga yavo, odo dihe na oundjuwo, oulikoshelo oshoyo onhele yokutelekela.
Ova twikila kutya ohava longifa oixwa ngee va pumbwa okulivatela voo tava telekele pondje osho vati inashi nyika oukoshoki.
“Ohatu mono yoo oixuna konghalo yomhepo ngeenge tai shendje ngaashi outalala, omhepo, oupyu wamatutu, doo etanda kadi li meameno lofaafaa,” omunambelewa umwe ta tumbula.
Okwa weda po yoo kutya onghalo ya tya ngaha ohai kala endangalati lakula mondjila yokulonga oilonga yavo va manguluka.Ovanambelewa ova nyenyeta kutya vamwe vomuvo ava va nyika ounyasha ova fiya po oilonga veke lihonga koiputudilo va ka mone oilonga i li xwepo itava mono oixuna.
“Paife eengaba oda kalelwa ashike kovapolifi ava vakulunhu meedula shaashi itava dulu oku ke liwedela ko kelihongo lavo. Molwaashi ovapolofi ava va kalela eengaba ova kulunhu no inava nyashuka nawa, ihava dulu okutondoka. Eshi osha ningila ovalandifi vomahooli angungula va pitife omahooli va manguluka oshoyo oingangamwifi. Paife osha ninga omukalondjikilile notashi shunifa ekonomi loshilongo pedu,” umwe womuvo natango ta ti.
Ovapolifi otava indile epangelo li va tule moilonga mokuyandja omihandjo di li monghalo i li xwepo. Ova twikila yoo kutya ove udite kutya ekwafo eli otali ningi oilonga yavo ipu, notava ka longa ve na omukumo nelitulemo ngeenge tashi ya pokuamena eliko loshilongo naikwao ihapu. Komufala wopolifi moshitukulwa shaHangwena Elizabeth Sibolile okwa hokolola kutya omanyenyeto ovanambelewa inaa fika mombelewa yaye. Okwa twikila kutya epangelo ola yandja omaumbo kovapolifi e li popepi neengaba apa hava longele. Omaumbo aa oku li meameno nopamufika u li nawa, Sibolile ta tumbula. Okwa popya yoo kutya ovapolifi vahapu ava hava di meetenda ovava inava hala okufuta komwedi omaumbo aa va pewa kepangelo.
Okwa twikila kutya omaumbo ohaa futilwa she likolelela kutya omunambelelwa oha kwata ingapi komwedi.
“Oimaliwa yomaumbo oohi yandjwa kepangelo onga o “housing allowance” omo vahapu vomuvo iinava hala okufuta, va hala oku ka dja keetenda doshali odo di li monghalo itai nuwa omeva. Vamwe natango inava hala okudja momaumbo epangelo molwaeemhango edi di li mo,” Sibolile ta ti.
Komufala okwa weda po yoo kutya keshe omunambelewa e li meetenda ta mono oixuna na dengele ombelewa yaye.