Ovapolifi vatatu ovo vati va yasha nokudipaa omupolifi mukulu e na oudu wopamadiladilo ova kwatwa po.
Omupedu Commissioner wopolifi mOshana Ottilie Kashuupulwa okwa koleka ta ti ovafekelwa ova holoka momhangu yaShakati Etivali noshibofa shavo osha undulilwa komafiku 17 Mai 2023 omanga taku ningwa omakonakono e lixwa po.
Ovafekelwa ovo Absai Julius weedula 57, Sem Iikela weedula 38, naMoses Titus 37, notava pangulilwa oshibofa shedipao.
Oshiningwanima eshi osha ningilwe momukunda Ehafo lyaKandenge moshikandjohoololo Uuvudhiya moshitukulwa shaShana efimbo longula oshivike sha dja ko.
Nakufya okwa tongololwa oye Negumbo Embashu omunambelewa mukulu wopolifi poshitaashi shopolifi mOshakati, nokwa kala vati e na oudu wopamadilaadilo. Opolifi oya hokolola tai ti Negumbo okwa li e kwete oshiti a hala okudenga ovanambelewa vopolifi pefimbo kwa li tava popi naye kutya na tule po oshiti shaye. Vati ovanambelewa vopolifi ova umbila oshita eendjebo mbali noku mu yasha komaulu nomedimo.
Opolifi oya hokolola tai ti Negumbo okwa xulifila mondjika pefimbo kwa li ta twalwa kokapangelo kOnaanda kovapolifi.
Eshi a kwatafana naKundana, omukulukadi waNegumbo Hendrina Embashu okwa hokolola ta ti okwa dengwa pomutima kefyo lomushamane waye ou a yashwa nondjebo komesho aye noshoyo komesho yokaana kavo konghelo. “Negumbo okwa li ashike e kwete okati kashona kodimbo e li ofika. Ina nyamukula ovapolifi eshi kwa li tava popi naye. Ova dipaa omushamane wange ehe na eshi a ninga,” ta hokolola.
Okwa hokolola ta ti Negumbo okwa hangika e li ofika meumbo laye konima eshi ovapolifi va dengelwa ongodi komushiinda shavo kutya Negumbo okwa tameka noudu wopamadilaadilo shaashi vati omafimbo amwe oha kala e li nawa omanga omafimbo amwe oha tukuka.
“Eshi ovapolifi va mona kutya Negumbo ina hala okukupulashi oshiti eshi kwa li e kwete, ovapolifi vavali ova umba eendjebo loikando yonhumba nokuyasha omushamane wange,” Embashu ta ti.
Okwa ti okudja opo omupolifi umwe okwe mu tuma opo a ka tale ekumbafa monduda. “Konima eshi nda eta ekumbafa ovapolifi ova tutumbila Negumbo motuwa konima a tonyenwa mekumbafa noku mu twala kokapangelo,” ta ti.
Embashu okwa ti nokonima yefimbo okwa mona ovapolifi ve uya keumbo laye tava hokolola kutya Negumbo okwa xulifila mondjila yokuya koshipangelo.
fhamalwa@nepc.com.na