OSHAKATI – Omukulunhu wopolifi moshitukulwa shaShana Commissioner Naftal Sakaria okwa lombwela oshiwana opo shi kale tashi lopotele ombelewa yaye ile ovakulunhu koitaashi yopolifi kombinga yovapolifi tava yakula nai oshiwana.
Okwa yelifa ta ti oilonga yomupolifi okuyakula oshiwana nokuamena ovanhu.
Edi Sakaria okwe di popya pefimbo loshiongi shopolifi novakwashiwana sha li kolukanda Uupindi mOshakati oshivike sha dja ko.
Opolifi okwa li ya shakeneka oshiwana nelalakano okuyandja ouyelele kombinga yomayakulo opolifi nosho yo nghene oshiwana shi na okulongela kumwe nopolifi okulwifa oimbuluma.
Oshiwana okwa li sha hafa okushakeneka opolifi molwaashi osha mona omhito yokupula opolifi omapulapulo kombinga yoipambele yopolifi.
Olukanda Uupindi olo limwe la didilikwa li li pombada ngeenge tashi ya poimbuluma mOshakati.
Sakaria okwa kumaida oovene veendingosho nosho yo eengeleka opo di xulife po okuninga omaweelelo nomangelengele.
Okwa ti unene tuu eendingosho neengeleka odo dihe na omikanda odo unene da dilikwa itadi liufa komilandu odo da tulwa po.
Okwa ti ombelewa yaye oya lopotelwa kombinga yovanhu tava ningi omaweelelo efimbo loufiku.
Sakaria okwa yelifa ta ti ovanafikola inava pumbwa omaweelelo ngeenge tave lihongo omakonakono.
“Opolifi otai ka yandja ehandukilo kukeshe omunhu ina hala okuliufa komilandu odo da tulwa po okukelela omaweelelo,” ta ti.
Okwa kumaida oovene veengeleka opo va xulife okukaleka ovanhu meengeleka fiyo eevili da pitilila molwaashi osha nyika oshiponga ngeenge omunhu ta ende oufiku.
“Otwa lopotelwa ovakainhu va ninga oihakanwa yokukwatwa onghonga ngeenge tava di keengeleka efimbo loufiku,” ta ti.
Okwa weda po ta ti ovanhu vamwe ova ninga oihakanwa yokunyekwa omaliko avo ngeenge tava ende oufiku okudja keengeleka.
Okwa kumaida oshiwana shi kotokele okatoo molwaashi ovanhu paife ove lininga ookalyamupombo vokutula ovanhu mokatoo.
“Natu longeleni kumwe okulwifa oimbuluma momidingonoko detu. Kaleni mu na eenomola deengodi dopolifi molwaashi osha fimana,” ta ti. –fhamalwa@nepc.com.na