Auleria Wakudumo
Omulihongi koshiputudilo shoWelwitchia moNkurenkuru moshitukulwa shaKavango West pamwe namukwao umwe ova anyenwa elifutilemo komhangu yaKahenge moshibofa shekengelelo omo ve lininga vati ovapolifi voipupulu nokukengelela ovanhu.
Omulihongi, Romanus Kampasi a siivika nawa Given pamwe naJohn Lutanga nedina la shivika nawa Joe Mafela otava tamanekwa okukengelela ovanhu oikando ya hanga puivali eshi vati ve lininga ovapolifi ovanaipupulu.
Omupopiliko wopolifi moshitukulwa shaKavango West, Chief Inspector Raimbert Muronga okwa holola kutya ovalihongi ova kwatwa po oshivike sha djako.
Otaku hololwa umwe womovatamanekwa e lininga oye omupopiliko wopolifi moshitukulwa shaKavango West Chief Inspector Murongo namukwao okwe lininga oye Inspector Martin okudja koshitaasi shopolifi shaRundu.
Eshi ove shi ninga oikando ya yooloka, tava longifa eengodi dopeke. Ovatamanekwa ova longifa edina lovapolifi ovo ve shiivike nawa moshitukulwa opo va pondole oilonga yavo youkengeleledi. Ova kengelela nokulombwela ovakengelelwa va ninge ashishe osho va li tave va lombwele shaashi vati ovapolifi.
Muronga okwa kunghilila oshiwana opo shi kale oupafi nokulivangeka okuyandja omauyelele avo unene ouyelele wokombaanga ngeenge tashi dengelwa kookalyamupombo ovo ve lininga ovanambelewa vopolifi.
Opolifi moshitukulwa shaKavango West otai indile natango ovakwashiwana aveshe ovo va kengelelwa kovatamanekwa ava ashike inava lopota ile va patulule oshibofa opo va kwatafane noshitaasi shopolifi shaNkurenkuru ile va kwatafane nopolifi i li popepi navo opo va dule okupatulula oshibofa.