Elelo lodoolopa yaShakati ola longa shomupondo muDesemba, konima eshi la yandja omalukalwa kovanhu ve li 122.
Omanga ola xupifako veli 58 vakele veli 180 kumwe aveshe, ovo va teelelika va kale va mona omalukalwa avo mu Januali fiyo Februari neudo.
Ovakalimo ava ova tembulwa okudja molukanda laShoopla mOshakati, olukanda eli la ninga ondobe yomeva paife.
Ova tembulilwa kolukanda laNawa natango mOshakati, oko va pewa omalukalwa oshali taa akelele.
Mayola wodoolopa yaShakati Leonard Hango okwa ti eyandjo lamaumbo ta akalele kovakalimo, ola yandjwa onga eufo komupresidente woshilongo Netumbo Nandi-Ndaitwah, konima eshi ali atela po ovakalimo pefimbo lodula petameko lodula yadjako.
“Eshi twa lombelwa kOmupresidente otwe shitula moilonga, novakalimo ova pewa omalukalwa avo oshali nokwa kula,” ta ti.
Okwa twikila kutya omaumbo okwa tulwa yoo omeva nale, nova teelela ehangano eli hali yandje omalusheno modoolopa “Oshakati premier electricity” li uye li tule omalukalwa aa olusheno koshali, voo tava tameke okutulako voo vene ngeenge lapuko.
Opoloyeka oya tameka nale mo 2019, nokudja momukokomoko wo 2019 fiyo 2025 elelo doolopa la dula oku yandja omalukwa kovanhu veli 1139.
Hango okwa ti natango eyandjo lomalukalwa oha li yandje eemhito doilonga kovakalimo vomodoolopa, unene ovanyasha ovo hava kwafele nomatembu ovanhu ava hava kala vakumwa kefundja.
Okwa twikila kutya okudja modula 2019 fiyo oneudo, ova dula oku yandja oilonga kovanhu veli 481. Maria Makata omunambelelwa womelelo doolopa oo ena oshinakuwanifa sho ku tembula no ku kwatela omalukalwa aa komesho okwa ti, elelo doolopa ola li la unganeka oihauto oshoyo omaloli atute ovanhu oku dja kOshoopala la ukifa kOnawa. Simeon Joseph oo omukalimo umwe womwaava va vali tava tutwa Olomakaya okwa ti, okwa pandula elelo doolopa eshi le li tetuka diva, shaashi efundja ola etako omayulu lela.
“Nafye apa twa tungila otwe yapo ashike moku hena nghee, shaashi ka twa li tuna apa vali twa li hatu dulu oku dika omalukalwa etu,” ta ti. Selma Enkono oo naye a pewa onhele okwa ti okwa pandula neenghono shaashi ka li e na onhele yaye kuye vene.
“Oshili onda pandula elelo lodoolopa laShakati shaashi ola longelange oilonga yomupondo. Ngaashi paife ita ndi futu vali eenhele doku haila,” ta ti.
taimihaihambo2000@gmail.com
