OSHAKATI – Inspekta wopolifi ta longele moshipangelo shaShakati Cecilia Mboye okwa ti ombelewa yaye ohaku holoka ovashamane ve li mopendjela tava nyenyeta molwaashi tava hepekwa kovakulukadi vavo.

Mboye okwa yelifa ta ti unene tuu ovashamane ovo va li ovanashilonga ova ninga oihakanwa yokulilwa oshimaliwa shavo koonekulu vavo.

Edi Mboye okwe di popya pefimbo loshiongi shopolifi novakwashiwana sha li kolukanda Uupindi mOshakati onghela.

Opolifi oya shakeneka oshiwana  nelalakano okuyandja ouyelele kombinga yomayakulo opolifi noshoyo nghene oshiwana shi na okulongela kumwe nopolifi okulwifa oimbuluma.

Oshiwana okwa li sha hafa okushakeneka opolifi molwaashi osha mona omhito yokupula opolifi omapulapulo kombinga yoipambele yopolifi.

Olukanda Uupindi olo limwe la didilikwa li li pombada ngeenge tashi ya poimbuluma. 

Okwa lombwela ovadali ovo hava nangala monduda imwe nounona vavo opo va tule elapi pokati kombete yavo nounona.

Okwa yelifa ta ti elalakano opo ounona va ha mone osho tashi ningwa kovadali vavo kombete.

Mboye okwa ti ovakulukadi ohava monika nawa omanga ovashamane tava monika va fya odjala molwaashi ihava li oshimaliwa shavo. Okwa kumaida oshiwana opo shi xulife po okuholeka ovapambele vavo ngeenge va kwata umwe womupambelele wavo onghonga. “Omunhu ngeenge a ninga oshihakanwa shekwatonghonga na twalwe koshipangelo diva opo a ka mone epango lopaunamiti pefimbo,” ta ti.

Ovakwashiwana molukanda Uupindi ova kumaidwa opo va xulife po okuholeka ookalyamupombo ngeenge va longa oimbuluma. Opolifi oya ti oshi li eshongo linene ngeenge oshiwana itashi yandje ouyelele kopolifi. Omupopiliko wopolifi moshitukulwa shaShana Frieda Shikole okwa ti  oimbuluma ngaashi oumbudi woimuna, ovanhu tave lidenge mwa kwatelwa omahepeko omomaumbo nosho yo oumbudi weetuwa otau dana onghandangala ya kula molukanda Uupindi. Inspekta Shilongo Thomas ta longele koshikondo shokukonakona oumbudi woimuna okwa ti ovanhu ohava di momalukanda ndele tava ka vaka oimuna komikunda di li popepi nOshakati.

“Otwa kwata ovanhu vahapu hava hangika va leka ombelela yoikombo meebashu davo,” ta ti.

Okwa ti opolifi oi na okatendo koveta taka ti oipindi i na sha noimuna inai pitikwa oufiku.

“Ngeenge omunhu ta lande oshimuna na pewa ombapila tai ulike ouyelele kutya oshimuna osha dja peni,” ta ti.

Okwa popya ta ti ombelewa yaye oya didilika evako leendoongi li li pombada moshitukulwa shaShana.

“Ovanhu vamwe ohava vake eendoongi ndele tava ka landifa okapana,” ta ti.

Thomas okwa kumaida oshiwana opo shi longele kumwe nopolifi okukandeka oimbuluma moshitukulwa.

“Lopoteleni opolifi ngeenge pe na omunhu ta fekelwa kutya ota landifa ombelela ya vakwa,” ta ti.

-fhamalwa@nepc.com.na