ONGWEDIVA- Ovatoolinghundana tava longele koikundaneki ya yooloka ova holola eudo nai lavo molwashi vati hava undavaulwa kovapolifi vokoshikondo sheameno lovanenenhu (VIP) unene ovo hava ende nOmupedu Presidente Netumbo Nandi-Ndaitwah.
Ova hokolola tava ti ova didilika alushe ngeenge tava ka toola eenghundana koyiindili ku na Omupedu Presidente ohava va undulwa koVIP ngeenge tava faneke ile tava kufa oudivo veenghundana.
“Omunhu owa ifanwa u toole eenghundana, ashike eshi toi poima owa fa to longo u li kondje yovata. Ihatu faneke vali twa manguluka. Opo nga uli po tofanake ye omupoilfi woVIP ota fikama komesho uoye, ile to lombwelwa uhe ne ko shaashi vati ou li komesho yOmupedu Presidente,” umwe womovatoolinghundana ta hokolola.
Ova toolinghundana ova popya tava ti opolifi yoVIP nai fimaneke oilonga yokutoola eenghundana molwashi otava longo oilonga yavo nombili.
“Fye ohatu kala ashike twa hala okufaneka ile okukufa oudivo memanguluko, ngaashi naanaa hati shi ningile ovanenenhu aveshe, mwa kwatelwa ovapresidente voshilongo, shaashi oshi li oshitopolwa shoilonga yetu,” Omutoolinghundana mukwao ta nyenyeta.
Omutoolinghundana mukwao okwa ti omangwadjaulo oo tava ningilwa otai ulike kutya oufemba wovatooli nghuundana, noikundaneki inau valulwa.
“Ovatoolinghundana otwa pewa oshinakuwanifa shokuyandjaneka eenghundana domondjila koshiwana. Ngeenge ka pena ovatoolinghundana oshiwana itashi udu eenghundana dishi oku li neekelwa,” ta ti.
Eshi a kwatafana naKundana, kakukutu kopolifi Inspector General Joseph Shikongo okwa ti ovatoolinghundana ova fimana molwashi ohava kundaneka oshiwana nouyelele.
Okwa yelifa ta ti ka shi li mondjila ngeenge opolifi yoVIP otai yi oilonga yovatoolinghundana moshipala pehe na etomhelo la yela no itai popile eundolo nengwadjaulo lovatoolinghundana.
“Ovatoolinghundana ove na ekwatafano liwa nopolifi molwashi ohava longele kumwe nopolifi okuyandjaneka ouyelele kombinga yoimbuluma,” Shikongo ta ti.
Okwa ti ovapolifi voVIP nava kale ve na elongelokumwe novatoolinghundana ngeenge ve li poivilo pena ovaleli vopombada.
Ashike kombinga ikwao, Shikongo okwa ti ovatoolinghuundana vamwe ohava kala va hala okufaneka keshe pamwe, nopeenhele opo pa tulwa omangambeko kopolifi.
Okwa weda po ta ti eameno lovaleli lopombada ola fimana nola oumbwa nokukalekwa po efimbo keshe.
Okwa yelifa ta ti koilongo imwepo ovaleli vopombada ohava longelwa ominyonena kovakwashiwana.
“Efimbo limwe opolifi otai longo oshilonga shayo unene tuu ngeenge omutoolinghundana ite li ufa komilandu da tulwa po koVIP,” ta ti.
Shikongo okwa lombwela ovatoolinghundana opo va djale oidjalomwa yoilonga yavo ile va tule ko oukalata voilonga koiyandjalomwa yavo.
“Osha fimana opo opolifi yoVIP i kale tai pula oukalata voilonga molwashi ovanhu paife ove li ninga ovatoolinghundana voipupulu,” ta ti.
Omunambelewa koshikondo shovatoolinghundana kombudsman John Nakuta okwa ti oilonga yovatoolinghundana nai fimanekwe.
“Ita ndi popile opolifi yoVIP tai yi oilonga yovatoolinghundana moshipala,” ta ti.
Okwa ti ovatoolinghundana ovailonga tava longo oshilonga shavo ngaashi naana ovanailonga aveshi hava longo oilonga yavo.