I Kae Matundu-Tjiparuro
OTJOMUISE – “Owami ngumbiri ombara ombe,” Kapuuo watja nao. Nu Karuaera apatasanisa amatje “Kako, eye kambara ombe.”
Imbi ombiari oviuru viomatjangua wongoramambo yeyuva yotjiingirisa indji o Windhoek Advertiser kombunda yondiro yomuyaruke Ombara Otjitambi yOvaherero, Katjikururume Hosea Kutako mo 1970 ami otja tjimezemburuka. Mezemburuka nao mena rokutja tjandje ongunduandje Sigfried Ndjarakana wendjiyetere ongoramambo indji kutja mbimutorokere kutja omambo woo Kapuuo na Karuaera ingo mayetjavi. Karuaera ingui Omuhonge Bartholomew Godwin Karuaera oruveze indo nguari omupiuke movitjitua noporotika yotjiwana tjOvaherero, neye aapatasanisa kutja Clement Kapuuo warier ombara okuyaruka motjihavero tja Kutako. Kapuuo, oruveze indo wina nguari omupiuke movitjitua viomuhoko nawina movitjitua vioporotika yongutukiro ya Namibia, tjinene nene otja tjiaaitjaka kongondjero yokuiisako ondjongo yohuurire yohoromende yombangu ya South Africa.
Ihi otji tjari otjikando tjandje otjitenga okuuta okuzuva omuyaruke Omuhonge Karuaera movitjitua vioporotika novio tjiwana posi tjandje nanguari eye wayata ozondambo ozongoto rukuru motjitamba tjoprotika ya Namibia notjo vitjitua viotjiwana na tjingetjo movitjitua viongamburiro. Omayuva ingo kapari ombangu pokati kotjitamba tjongondjero yongutukiro notjongamburiro tjinene kotjingi tjivandu mbari nondjara nonyota yongutukiro ovakuatera va Africa, muwo mumuari Omuhonge Karuaera. Mowatjiri mozondunge ozombaera zoporotika notjirua tjongutukiro, otjiwana tjozombongo ondjari ombitira po ombupu kuimba vourizemburuka woporotika tjimuna omuyaruke Omuhonge Karuaera novakua.
Posi movingi viarue omuyaruke Omuhonge Karuaera omayuva omatenga wotjirua tjombiririro yohuuire mazemburukirua korupa rue mokutjanga otutuu tuomitjemo, rutenga kEhika rOmahi nu kombunda kOmihoko Omikutasane kutja otjihoromende tjombangu tja South Africa tjiise okupandera po Namibia, oruveze indo ndari o South West Africa. Movito ovingi viarue oruveze rombiririro yohuurire, omuyaruke Omuhonge Karuaera wari omutjangerepo wa Kutako, eye puna ovanane varue ovakua tjimuna Captain Hendrik Witbooi nOmuhonge Theofilus Hamutumbagela mbahongorera omatjangero wotutuu tuomitjemo itui.
Wina mozombura ozonguru zotjirua tjombiririro yohuurire, omuyaruke Omuhonge Karuaera mazemburukirua koku hongorera Oruuano rOmbuisiro wOvakuatera va Africa, o African Improvement Society mo 1940, oro nduari orutu tjinene mumuari ozomitiri novahongua vo St Barnabasa ovakuru. Varue mbauta orutu indui puna omuyaruke Omuhonge Karuaera ndua kunua ombepo i Marcus Garvey, nguari norutu tjingero mo America indui o Negro Improvement Association of America(NIAA), oo Berthold Himumuine (omitiri), Clement Kapuuo (omitiri), Erwin Tjirimuje na Dawid Meroro (omunagetjeva).
Omuhonge Karuaera tjigetjo wari ohongora momazikamisiro nomautiro watjimue tjovira vioporotika ovikuru mo Namibia, o South West Africa National Union, o Swanu, ndjautua mu Ndengani tjiyari 27 mo 1957, kombunda yorukosi romieze wokurirongerisa iyokomiti yapeke yongundeveta ndjazikamisiwa iyounepo wo Tjirata tjOmbara Kutako, norutu rOzohoze. Okomiti indji komautiro yari nounepo utano, omuyaruke Omuhonge Karuaera, Clement Kapuuo, John Garvey Muundjua, Erwin Tjirimuje na Zedekia Ngavirue. Wina momakuruhungi omuyaruke Omuhonge Karuaera makuambua kombepo yokuuta ombongo indji African Methodist Episcopal Church (AME) tjitjauta ozombura tjimazeutire mo 1950 nozohongora tjimuna Festus Kandjou. Otjivepo ihi tjakaseinina momazikamisiro wombongo yOruuano nOmuhonge Reinhard Ruzo otjotjiuru tjayo. Ombongo indji yapoka kombongo yoruhindo okukoza otjivepo tjokuhonapareruapo iyozombongo za Europa. Omuyaruke Omuhonge Karuaera tjigetjo wakayenda komurungu nahongorerepo omazikamisiro wOruhindo ro AME mo Namibia, eye mari okanepo ohongora nu kehi yayo asembamisa oruveze romarongerisiro wounatje komahongero oro ngaa kundinondi ndukawondja.
Wari okanepo ohongora ko Swapo nganduu tjazapere Osondaha ozoiri ozonene zomuhuka, nu wakara norupa motjirua tjongutukiro nokuhina okuvarurua nu munao ahumu kotjihoromende tjombangu tja South Africa tjitje mutuiire kehi yoma kunino womburuma nomaurumisiro, okukamburua nomapando. Omapando tjingewo inga yari mo 1979 owo novakuao varue o 70 tjivakamburua nokutiziwa kehi yeraa enambondi indi o AG/1978 ndari rimue romaraa Omunanenepo wa South Africa mo Namibia, Marthinus Steyn ngaanana nawo o Namibia neke rotjitenda ndaa rihazemburuka ouyara nousemba wovakuatera va Namibia. Tjimue tjotjiungura tjo tjiwana tja seinine natjo yari omuhingere weyuva pomazemburukiro wozombura o 43 zondiro ya Kutako tjitjasembamisirue iyOtjaHosea mu Suramazeva ombura indji. Omuyaruke Omuhonge Karuare masuvisia Oroviungra ndimariyende mOmbongo yOruvanda nondjozikiro ndjemupuire otjombangane.