ONGWEDIVA – Ovanhu moshitukulwa shaTjozondjupa ova lopotwa tava mono oixuna ngeenge tashi ya komayambidido haa yandjwa koipangelo nopolifi molwomhumbwe yoyeendifo.
Ngoloneya woshitukulwa James Uerikua pefimbo a li ta yandje omushangwahokololo wo 2022/2023 okwa hokolola kutya oipangelo aishe moshitukulwa oi na ashike oihauto ya fika peepelesentsa 57 neeambulansa di li peepelesenta 64 tadi tondoka dihe na omapuko.
“Molwomwaalu wovanhu ou tau hapupala moshitukulwa shaTjozondjupa, oyeendifo nayo otai ende tai shongola yoo tai kulupa,” Ueriku ta tumbula.
Okwa twikila kutya oshitukulwa oshi na elao linene sha pewa omaano oambulansa koUnited Nations High Commissioner for Refugees (UNHRC) opo shi dule okulongifa.
Ngoloneya okwa yelifa yoo kutya moshitukulwa ove na mo oipangelo ya kula ine, eekilinika di li 19, noupangelo
vomomikunda ve li 239.
Okwa tumbula yoo kutya natango mOtjozondjupa omu na oitukulwa imwe i na oipangelo ihe li pamufika wokukala ovanaudu ngaashi, okilinika yaKondjatu, Omatako, Ovitoto, Oshipangelo shaKahandja oshoyo Otjiwarongo.
Ngoloneya okwa hokolola kutya dimwe domeenhele da tumbulwa oda pumbwa eekila domidimba, omashina okuyandja omhepo yokutalaleka moitandelo netungululo.
Okwa twikila kutya eepolifi nado otadi nane noudjuu shaashi kadi na eehauto da wana.
Eshi ohashi etifa va longe noudjuu unene tuu ngeenge tava patolola oshoyo wanlihakana oiponga noiningwanima ikwao pefimbo shaashi kape na oyeendifo ya wana.
“Ashike nande ongaho eshi ihashi imbi ovanambelwa va wanifepo oilonga yavo,” Uerikua ta tumbula.
Ngoloneya okwa ti okwa hala epangelo li tameke okukufa ombinga mokuvatela okutunga eenhele edi, shaashi ohadi dana onghandangala yakula ngee tashi ya keyambidido moshiwana.