Oshipotha shomulumentu ngoka a dhipaga okanona komukulukadhi gwe komimvo ntano mehuliloshiwike osha undulilwa komasiku 22 Maalitsa omanga a kalekwa mondholongo.
Rikki Narib gwomimvo 29 ota tamenekelwa oshipotha shedhipago lyoshiningilawina sho a dhipaga okamwanamati komukiintu gwe.
Narib ngoka a li a tindi kutya oku na ondjo moshingwanima moka komeho gompangu yaWalvis Bay, okwa ti oti ikalele po ye mwene, ina pumbwa hahende.
Nonando aakwanezimo yaNarib okwa li ya kutha onkatu yoku ningi onkambadhala yokugandja ombili peha lyomupambele gwawo molwa oshinima shoka a ningi, oyendji komalungula otaya yamukula kutya aakwanezimo okwa li ye na okukutha onkatu omanga omulumentu ngoka a kala ta hepeke omukiintu gwe.
Otaku hokololwa kutya omukiintu ngoka okwa kala mondjokana ya nyayika no uhepekwa kuukume ke ngoka.
Omukiintu ngoka okwali a hokolele omutoolinkundana gwoNew Era kutya okwa kala nokulopota omahepeko ngoka kopolisi moshitopowa shErongo, ihe inashi kwatha sha.
“Omasiku ngaka omanga okanona kandje inaka dhipagwa, onda kala nda thikamena opolisi, tandi kongo omakwatho, ihe ohandi shunithwa ko inaandi yakulwa.
Ethimbo limwe otandi lombwelwa kape na iiyenditho,’’ ta hokolola ngaaka.
Ta pula kutya ohauto oya zi peni yi ka tale ko omudhimba go kanona ke ngele petameko kaya li po, anuwa oohauto odha teka.
Okwa hokolola kutya oku uvite kutya opolisi inayi longa sha gwana okugamena omwana, naye mwene, oshoka ngeno okanona ke inaka dhipagwa.
Oyendji komalungula oya holola euvonayi kutya aapolisi itaya gwanitha po iilonga yawo okuyambidhidha oshigwana.
“Ohatu kumagidhwa tu lopote omaupyakandhi getu kopolisi, ihe kashi ivule, aapolisi ohaya kutha ashike onkatu uuna oshinima sha holoka omanga ngele ya lopotelwa kuyele itaya kwathele,” gumwe moradio a nyenyeta ngaaka.
Simon Shikoyeni ngoka naye a li a popi moradio yoShipi FM okwa ti, aapolisi mboka oya pumbwa okulalekwa miilonga pakathimbo, opo ya gandje oshiholelwa kuyakwawo mboka nayo itaaya gwanitha po iilonga yawo.
Oshiningwanima shoka shoka osha holoka Etitano lya zi ko moshitopolwa Erongo.
Otaku hokololwa kutya omulumentu ngoka okwa kala ta hepeke omukiintu gwe noku mu ningila omatilitho uule womimvo dha piti.
Sha ikolela koshifokundaneki shaNew Era, okanona hoka ok ali momake gomumwayinagona gwayina sho ka li ki ilwapo komulumentu ngoka, noku ke ka dhipaga.
Nakusa okwa tseyika nedhina Wilfred Dantani Eiseb.
vkaapanda@nepc.com.na