Ngoloneya woshitukulwa Erongo Neville Andre ota ti oyuyeemo oya shuna pedu neenghono, unene modoolopa yaSwakopmund. Ta ti eshi osha etifwa konghalo yoCovid-19 ei tai imbi ovatalelipo vokondje yoilongo ve uye oku talela po odoolopa yaSwakop ngaashi naana sha kala shito.
Okwa didilikwa odoolopa yaSwakop oyo yimwe hai kala ina ovatalelipo vahapu va dja meni nokondje yoshilongo unene tuu pefimbo lomafudo. Odoolopa yaSwakopmund ohai kala ina eemito doilonga omo ovanhu vahapu hava mono oilonga meehotela ile meenhele dokulandifa oikulya.
Andre okwa hokolola ta ti odoolopa ei oya kumwa neenghono konghalo yoCovid-19 shaashi eenhele dihapu domangeshefelo oda pata paife, ngaashi eehotela. Okwa ta ti unene tuu oshikondo yomatalelepo osho shimwe kwa li hashi eta oshimaliwa nokuyandja eemito doilonga modoolopa, ashike paife oyuuyemo oya shuna pedu.
Andre okwa ti ovanhu vahapu kwa li hava longo meehotela ova kanifa oilonga, oshoyo novanhu ava kwa li hava landifa oinima yoshiwambo ei ya longwa keenyala navo ove li moluhepo paife shaashi modoolopa iha muya vali ovatelelipo.
Okwa yelifa ta ti oshikondo shomatalelepo oshi li meshongo lopomashimaliwa paife shaashi osha xulifa po oilonga yasho, naashi osha shunifa oyuuyemo pedu.
“Ngeenge onghalo yombuto yoCovid-19 oya shuna kouwa, noilonga yoshikondo shomatalelepo nayo otai ka tameka modoolopa yetu. Onghee paife natu twikile a shike oku li ufa komilandu da tulwa po doCovid,” Andre ta ti.