WINDHOEK – Ozina womumati gonomvhura 27, ogu gadipagere komisare govatwjayuki Likius Valombola ngesi awo kuna kuhundira veta zitarepo nawa. Monika Kambonde, ozina womumati ogu vadipaga mokumuroya, Helao Ndjaba, katente asi nampili ngomu asi Valombola katambura unzoni wokudipaga, age simpe kapi gapa ekoro lyanakufa konda asi morwa sinke gadipagera mumati ogu momukaro gwangesi.
Mokukwama ekonakono eli varugana vaporosi vaNamibia, mukonakoni ogu Moses Shivolo, Ndjaba ogu gakere siruwo sina asi silyo sombunga zovarongwa ndi vana kutumbura asi Nanso, Age kwakere tandindire taxi aronde posiruwo sooso vamuroyere momutwe mokwedi kwaMay, 19 morukanda rwaKatutura. Shivolo yimo ngoso ana kugava umbangi wendi apa nye gakamonekere Valombola kompanguro konyima tupu apa vamukwete morwa kudipaga.
“Kapi namuzuvhire nampili nakauke ahuyunge asi munwange kwamutukire, kwamuveke ndi asi nampo valitangwisire nendi komeho vamudipage. Eyi nazuvhire ame moomu tupu ana kutanda asi age kwahimburukire mehauto lyendi makura taroya munwange. Nahara apenge usili asi yinke gamuroyerere, yimo ana kutamba Kambonde, ogu kahuyungire rokuhova kutunda tupu apa munwendi vamudipagere. Valombola kakamonekere kompanguro zaKatutura omu kakamupurakenene mupanguli Namwenyo Shikalepo.
Nampili ngomu ana kara asi age kwakara ponze omu galifutira yimaliwa yokusika koN$15 000, age kakere mekeverero lyenene lyovaporosi vaNamibia apa nye kakamonekere kompanguro zendi. “ Morwa nayinye nye oyo yahoroka kuna kumoneka asi age yimo nawa nawa gahere asi adipage munwange.” Yimo ngoso vana kutanta ozina vana kufa.
“Ame kapi nani kara noyimaliwa nye nakara naKarunga, musiti gwetu. Age nye Valombola gahepa kuyidiva asi mahodi gange kapi naga kara tupu asi kuna kulira tupu. Umbondo ou waValombola kuna kuretesapo magazaro gomadona omu vana kuyigendesa morwa age kwamukwete tavamugusamo ntani tavakamukwata hena. Valombola kwamukwete makura tavamusigi eyi yaninkisire ekoro novantu navenye vakare vanahanduka.
Kambonde kapi gakere negano asi aze kovanambudi, nye morwa mokutara yininke omu yina kuhoroka ntudi kahepa kuza tupu nye kovanambudi. Age kapi ana kulikida sinka ndi asi nofa odo dina mugumu. Age kapi ana kuyimona asi vana vana kufa kuna vasigi kwahana guhyewo. Nsene tatanta asi mokudipaga munwange kapisi yimo kagazarere, morwa sinke nye gapilire kulituramo mokupopera munwange asi gahadogoroka.
Age kwaroyere munwange tayukilire kembo, kumwe nokukarara nombili ngwendi gogu asi kapi ana dipaga muntu ndi asi kwadipaga sikorama. Mukurwa nakufa, Leopold Nghiluamo, morwa sinke Valombola vana kumukunga ngwendi gogu asi modorongo ana kutunda? Ose ngesi kuna kuyimona nye asi vaporosi vetu kukunga vava vakara noyimaliwa. Ndi eparu lyendi mulyo unene kupitakana lyamumbyang? Yimo ana kupura Nghiluamo.
Apa kahuyungire kosayitunga zaNew Era, age kuna kwaterere muna nakufa gomvhura zimwe, Nghiluamo, katente asi awo eyi vana hara veta zahepa kusikisamo sirugana sazo. Mpanguro zaValombola, ngesi kavazirundwilire dogoro January 19, 2019 omu vaporosi vana kukatwira ekonakono mokukwama koyo vana gwanako ngesi.